बानियाँद्वारा खानेपानी योजना उद्घाटन

१९ जेठ, हेटौँडा । हेटौँडा–१८ बडकुलेमा रहेको मौडी खोला खानेपानी तथा सरसफाई उपभोक्ता समितिद्वारा निर्माण गरिएको खानेपानी योजनाको प्रदेश सभा सदस्य ईन्द्रबहादुर बानियाँले उद्घाटन गरेका छन् । 
कार्यक्रममा बोल्दै बानियाँले जीवनको लागि स्वच्छ पानीको आवश्यकता पर्ने भएकाले पानीको उचित सदुपयोग गर्नु पर्नेमा जोड दिए । प्रदेश नम्बर ३ का प्रमुख प्रतिपक्ष दलका नेता समेत रहेका बानियाँले विकासमा सबै राजनैतिक दलले राजनैतिक स्वार्थबाट माथि उठेर सहयोग गर्नु पर्ने बताए । यस खानेपानी योजनालाई विगतमा आफुले सहयोग गरेको भन्दै आवश्यक थप सहयोग गर्ने समेत प्रतिवद्धता व्यक्त गरे । उनले अहिले घर नजिकको सरकार स्थानीय तह भएकाले विकासका लागि वडा कार्यालयसंग समन्वय गर्न समेत उनले सुझाव दिए । 
२०७२ सालदेखि निर्माण शुरु भएको योजनामा हाल सम्म १२ लाख ६० हजार खर्च भएको समितिले जनाएको छ । योजना २०७७ साल सम्ममा पूरा गर्ने लक्ष्य रहेको छ । कार्यक्रममा खानेपानी योजना संचालन गर्न सहयोग गर्ने प्रदेशसभा सदस्य ईन्द्र बानियाँ, जग्गादाता मुक्तबहादुर थापा मगर, राष्ट्रिय योजना आयोगका कर्मचारी सुरज मुक्तानलाई सम्मान गरिएको थियो । यसैगरी, समितिको १३ औं वार्षिक साधारण सभा समेत सम्पन्न भएको छ । कार्यक्रममा समितिका अध्यक्ष राजेन्द्र घलानले प्रगति तथा आर्थिक प्रतिवेदन प्रस्तुत गरेका थिए । समितिका अध्यक्ष घलानको सभापतित्वमा भएको कार्यक्रममा हेटौडा–१८ का वडा सदस्य तोयनाथ तिमल्सिना, नेपाली काँग्रेस मकवानपुका सचिव बुद्ध लामा, कोषाध्यक्ष गोपीलाल विक, समितिकी सचिव राधिका हुमागाई, स्थानीय बासिन्दा र संचारकर्मीको उपस्थिति रहेको थियो ।