सडक नबनाउने ठेकेदारलाई कारवाही गर्न ६ नम्बर वडाको माग

१३ असार, हेटौँडा । सडक निर्माणको ठेक्का लिई काम नगर्ने निर्माण व्यवसायी (ठेकेदार) लाई कारवाहीको माग गर्दै हेटौँडा ६ नम्बर वडा कार्यालयले जिल्ला प्रशासन कार्यालय मकवानपुरमा पत्राचार गरेको छ ।

वडा कार्यालयले सडक बोर्ड अन्तरगत प्राप्त बजेटबाट निर्माण गर्नुपर्ने हेटौँडा–६ चौघडादेखि रंगशालासम्मको कालोपत्रे नगरेको भन्दै ठेकेदारलाई कारवाहीका लागि प्रशासनलाई पत्राचार गरेको हो । आव ०७३/०७४ को बजेट अनुसार ठेक्का लिएको शुभेच्छा निर्माण सेवाले काम नगरेको भन्दै कारवाहीका लागि पत्राचार गरेको वडा अध्यक्ष अर्जुनप्रसाद चोलागाईले बताए । 

२०७४ बैशाख अघि भएको सम्झौता समाप्त भई २०७५ असार समान्तसम्मका लागि सम्झौताको म्याद थप भएको थियो । तर असार सकिन लाग्दा पनि निर्माण व्यवसायीले काम नगरेको भन्दै भुक्तानी रोक्का गरी छिटो भन्दा छिटो काम सम्पन्न गराउन आवश्यक प्रकृया अघि बढाउन जिल्ला प्रशासन कार्यालयलाई पत्राचार गरिएको छ । 

शुभेच्छाद्वारा सडक बोर्ड र नगरपालिकाबाट लगानी गर्ने गरी सम्झौता भएको अन्य क्षेत्रको कामको समेत भुक्तानी रोकी आवश्यक कारवाही अघि बढाउन प्रशासनलाई आग्रह गरिएको छ भने यसको जानकारी हेटौँडा उपमहानगरपालिका कार्यालयलाई पनि दिईएको वडा अध्यक्ष चौलागाईले बताए । सडक कालोपत्रेको काम अघि बढाउन पटक पटक पहल गर्दा निर्माण व्यवसायी सम्पर्कमा समेत नआएको पत्रमा उल्लेख छ । पत्र प्राप्त भएपछि निर्माण पक्षलाई प्रशासन कार्यालयले असार २० गतेभित्र काम सम्पन्न गर्न अल्टिमेटमसहित निर्देशन दिएको छ । समयमा सम्पन्न नभए कारवाही प्रक्रिया अघि बढाउने प्रशासनले जनाएको छ ।

सडकमा ठूला ठूला खाल्डाखुल्डी हुँदा विद्यार्थी, वडा कार्यालयका सेवाग्राहीसहित यस सडकबाट पूर्वी मकवानपुर आवतजावत गर्ने सयौं सवारीलाई समस्या परेको चौलागाईको भनाई छ । ५५ लाख रुपैँयाको लागतमा निर्माण हुन लागेको सडकको लम्बाई २.४ किलोमिटर छ ।