वन विकासमा न्यूरेनी पहिलो

भीमसेन पौडेल

६ साउन, हेटौडा । आव ०७२÷०७३ मा मकवानपुर जिल्लाको सामुदायिक वन विकास कार्यक्रम तर्फ हेटौडा ७ मा रहेको न्यूरेनी चिसापानी सामुदायिक वन उपभोक्ता समूह पहिलो भएको छ । यसैगरी फापरबारीमा रहेको नमोबुद्व सामुदायिक वन दोश्रो र मनहरीमा रहेको हरियाली सामुदायिक वन तेश्रो भएको छ । 
राष्ट्रपति चुरे तराई मधेश तर्फ हेटौडा ११ मा रहेको नवलपुर सरस्वती बसामाडी सामुदायिक वन पहिलो, हेटौडा २५ मा रहेको पञ्चकन्या सामुदायिक वन दोश्रो र हेटौडा २४ मा रहेको ज्योति सामुदायिक वन तेश्रो भएको छ । कबुलियती वन तर्फको पुरस्कारमा पहिलो त्रिभुवन राजमार्ग कमेरोडाडाँ कबुलियती वन, टिस्टुङ्ग ६, रुथुमभेक कबुलियती वन खैराङ ९ दोश्रो र महिला हरियाली कबुलियती वन सरिखेत तेश्रो भएका छन ।
 सामुदायिक वन भित्र वन्यजन्तुको संरक्षण र बासस्थानमा प्रभावकारी काम गर्ने सामुदायिक वन समूहलाई पनि वन कार्यालयले पुरस्कृत गर्ने कार्यको शुरुवात २ वर्ष पहिले देखि गर्दै आएको छ । यो पुुरस्कार दुवै पटक हेटौडा ६ चौघडामा रहेको रानी सामुदायिक वनले पाएको थियो । समूहले सालक लगायत अन्य वन्यजन्तुको संरक्षण गर्दै आएको छ ।
यस वर्ष वन्यजन्तु तर्फको पुरस्कार मनहरीमा रहेको सीमपानी देवकोट संयुक्त सामुदायिक वनले पहिलो, चुरेकाड सामुदायिक वन हेटौडा १८ ले दोश्रो र पञ्चकन्या सामुदायिक वन कोगटे ८ ले तेश्रो पुरस्कार प्राप्त गर्न सफल भएका छन । यसैगरी निजी वन तर्फ हेटौडा ६ का  किसान यादवप्रसाद उप्रती पहिलो आमभन्ज्याङ्ग ७ का किसान लालबहादुर बजगाई दोश्रो र हेटौडा ११ का किसान केदारप्रसाद बर्तौला तेश्रो भएका छन । 
निमित्त स्थानीय विकास अधिकारी किसन न्यौपानेको अध्यक्षतामा क्षेत्रीय वन निर्देशानालय र जिल्ला वन कार्यालयको संयुक्त बैठकले यो निर्णय गरेको रेन्जर ऋषि पराजुलीले जानकारी दिनु भयो । घोषणा गरिएका सामुदायिक वन, कबुलियती  वन र किसानलाई एक कार्यक्रमको आयोजना गरी पुरस्कार तथा प्रमाण पत्र प्रदान गरिने वन कार्यालयले जनाएको छ ।