गाउँपालिकाले धियालको युरेनियम पहाडको सदुपयोग गर्ने

५ फागुन, हेटौँडा । मकवानपुरको बकैया गाउँपालिका वडा नम्बर २ धियाल कालापानीमा रहेको युरेनियम पहाडको गाउँपालिकाले सदुपयोग गर्ने भएको छ । 
युरेनियमका कारण यहाँका बासिन्दाले स्वास्थ्यसम्बन्धी समस्या भोगिरहेको भन्दै गाउँपालिकाले यसलाई सदुपयोग गर्ने भएको हो । पहाड क्षेत्रको बस्ति स्थानान्तरण गर्दै पहाडको सदुपयोग गर्ने गाउँपालिकाले जनाएको छ । यसका लागि संघीय र प्रदेश सरकारसंग कानून ढंगबाट पहल गर्ने प्रयास भईरहेको गाउँपालिका अध्यक्ष दामोदर खनालको भनाई छ । ‘यसबारेमा ठोस ढंगले अघि बढ्न हामीले प्रदेश सरकारसंग पनि समन्वयको प्रयास गरिरहेका छौं, यो हाम्रो सम्पत्ति हो र सदुपयोग गर्नुपर्छ ।’ उनले यस क्षेत्रका बस्तिको व्यवस्थापनबारे समेत गाउँपालिका गम्भिर रहेको बताए ।
२०४७ सालमा खानी तथा भुगर्भ विभागले यहाँ युरेनियमको पहाड रहेको पुष्टी गरेको थियो । युरेनियम पहाड रहेको पुष्टी भएपनि स्थानीयलाई पर्ने असरको रोकथाममा कुनै काम नहुँदा यस क्षेत्रका बासिन्दा प्रभावित भईरहेका छन् । युरेनियम पहाडका कारण स्थानीयमा छालाको समस्या, मस्तिष्कसम्बन्धी समस्या र क्यान्सर समेतको जोखिम देखिएको स्थानीयको भनाई छ । 
युरेनियमको पहाड राज्यका लागि सम्पत्ति भएकाले बस्तिलाई उपयुक्त स्थानमा स्थानान्तरण गर्दै यसको सदुपयोग गर्न स्थानीयले माग गरेका छन् ।