तातोपानी नाका चार वर्षपछि मंगलबार सञ्चालनमा

File Photo

१४ जेठ, काठमाडौं । भूकम्प लगत्तै बन्द भएको तातोपानी नाका चार वर्षपछि बल्ल सञ्चालनमा आएको छ । 
अनौपचारिक रुपमा मंगलबार बिहान ४ वटा खाली कन्टेनर (नेपाल–चीन) पास प्रक्रिया पूरा गरेर ऊन ल्याउन खासा प्रवेश गराउँदै तातोपानी नाका व्यवसायिक रुपमा खुलेको हो । 
सोमबार दश वटा लोडर र कन्टेनरलाई पास दिए पनि चीन पक्षबाट बल्ल सहमतिको खबर पाएपछि काम थालिएको भोटेकोसी गाउँपालिकाका प्रमुख राजकुमार पौडेलले बताए । उनले भने, ‘त्यही अनौपचारिक सहमतीमा अन्ततः तातोपानी नाका मालबाहक सामग्री निर्यात गर्दै खुल्ला भएको छ, यसले सिन्धुबासीमा खुशी थपेको छ ।’ चारै वटा कन्टेनर फर्कदा ऊनले भरिएर फर्कने उनले बताए ।
नेपाल चीन जोड्ने मितेरी पुल निर्माण अझै नसकिएकाले अस्थायी चल्तीमा ल्याइएको पुलमुनीको कच्ची सडकको पुल हुँदै खाली कन्टेनर गएका हुन् । सोमबार बेलुकी नै ४ वटा कन्टेनर ‘पास सिस्टम’ सकेर तयारी हालतमा थिए । बुधबार चार वटा कन्टेनर ऊन लिएर नेपालमा नाका खुलेको शुभसंकेत दिँदै सो सामग्री राजधानी पुर्‍याइनेछ ।  
सुरक्षाकर्मीको कडा सुरक्षामा यो सबै काम हुने सीमास्थित सशस्त्र प्रहरी बलका प्रहरी नायव उपरिक्षक कृष्णगोपाल गुरुङले बताए । उनले भने, ‘उनीहरुको विशेष जोड सुरक्षामा भएकाले लामो समयपछिको नाकाको श्री गणेशमा चुस्त दुरुस्त बनाउँदै कडाइ गरेका छौ ।’
साभार : कान्तिपुर