खेलकुदको विकास र सम्मृद्धि प्राथमिकतामाः मन्त्री विश्वकर्मा 

२० असार, हेटौँडा । युवा तथा खेलकुद मन्त्री जगतबहादुर विश्वकर्माले मन्त्रालय अन्र्तगत प्रस्तावित बजेटले खेल क्षेत्रको विविध चुनौतिको सामना गरि खेलकुदको विकास र सम्मृद्धिलाई प्राथमिकतामा राखेको बताएका छन् ।
राष्ट्रियसभाको शुक्रबार बसेको बैठकमा विनियोजन विधेयक २०७६ अन्र्तगत युवा तथा खेलकुद मन्त्रालय माथिको छलफलका क्रममा उठेका प्रश्नको जवाफ दिँदै मन्त्री विश्वकर्माले अन्तराष्ट्रिय पदक तालिकामा देशको स्तरलाई माथि उठाउने तथा खेलका विविध क्षेत्रको विकास र सम्मृद्धि लाई प्राथमिकतामा राखिएको बताएका हुन् ।
उनले सबै प्रदेशमा अन्तराष्ट्रिय स्तरको सुविधायुक्त रंगशाला निर्माण गर्ने लक्ष्यका साथ अगाामी आर्थिक बर्षमा प्रदेश नम्बर २ को धनुषा, कर्णाली प्रदेशको सुर्खेत र सुदुरपश्चिम प्रदेशको धनगढीमा प्रदेशस्तरीय रंगशाला निर्माणका लागि १० करोड विनियोजन गरिएको जानकारी दिए । 
मन्त्री विश्वकर्माले खेलकुद पर्यटनको विकास गर्न जुम्ला, लुक्ला, हेलम्बु, मनाङ र घान्द्रुकमा हाई अल्टिच्युट टे«निङ सेण्टर स्थापनाका लागि पनि बजेट विनियोजन गरिएको बताए । 
उनले काठमाण्डौ उपत्यकामा सुविधासम्पन्न अन्तराष्ट्रिय रंगशाला निर्माण गर्ने, सात वटै प्रदेशमा सेवा सुविधा सम्पन्न रंगशाला निर्माण गर्ने तथा ७ सय ५३ वटै स्थानीय तहमा दीर्घकालिन महत्वका खेल मैदान बनाउने उद्देश्य बजेटले लिएको दावी गरे ।