जिल्ला लिगः क्वाटरफाइनलका २ खेल सम्पन्न

८ असोज, हेटौंडा । हेटौंडाको हुप्रचौरमा जारी दानबहादुर श्रेष्ठ स्मृति जिल्ला लिग फुटबल प्रतियोगिता अन्तर्गत बुधबार क्वाटरफाइनलका दुई खेल सम्पन्न भएका छन् ।
बुधबारको पहिलो खेलमा रियल स्टारलाई ५–१ गोलले हराउँदै बुद्ध युवा क्लब छतिवन सेमिफाइनलमा प्रवेश गरेको छ । बुद्धको जितका लागि राजन स्याङ्तान, सुरेन्द्र राई, सुरेश थिङ, सुवास ब्लोन र मिलन कार्कीले समान एक एक गोल गरे । रियल स्टारका लागी सुदाश श्रेष्ठले एक गोल फर्काए । 
यसैगरी दोश्रो खेलमा विजय युथलाई टाइब्रेकरमा ४–२ गोल अन्तरले हराउँदै एफसी पोताला सेमिफाइनल पुगेको छ । निर्धारित समयमा एक एक गोलको बराबरी भएको खेलमा एफसी पोतालाका सुमन छुमीले सुरुवाती एक मिनेट भित्रै गोल गर्दै टिमलाई अग्रता दिलाएका थिए । 
पहिलो हाफामा अर्को कुनै गोल हुन नसकेको अवस्थामा विजय युथका लागी अन्तिम समयमा पाएको पेनाल्टिलाई सदुपयोग गर्दै सुरज विष्टले खेल बराबरीमा ल्याएका थिए । 
बुधबारनै भएको तेश्रो तथा अन्तिम क्वाटरर्फानल खेल १–० को अवस्थामा अध्याँरो भएपछि रोकिएको छ । बाँकि खेल भोली विहिबार विहान हुने आयोजक जिल्ला फुटबल संघ मकवानपुरले जनाएको छ । 
अन्तिम क्वार्टरफाइनलमा हटिया स्पोर्टस एकेडेमी र शहिद स्मृति फुटबल क्लब विचको खेल १–० को अवस्थामा रोकिएको हो । खेलमा हटिया स्पोर्टस एकेडेमि १ गोलले अगाडी रहेको छ । एकेडेमिका लागी आयुर घलानल गोल गरेका हुन् । 
प्रतियोसिगतामा बुद्ध युवा क्लब छतिवन, डाँफे युथ क्लब र एफसी पोतालाले सेमिफाईनलमा स्थान पक्का गरिसकेका छन् । यसअघि मंगलबारको खेलबाट डाँफे युथ क्लब सेमिफाइनलमा प्रवेश गरेको हो ।
भदौको १८ गतेबाट सुरु भएको जिल्ला लिगको फाइनल खेल असोज ११ गते हुने छ । प्रतियोगिताको विजेताले १ लाख र उपविजेताले ५० हजारसहित ट्रफी र प्रमाणपत्र प्राप्त गर्ने आयोजकले जनाएको छ ।