फुटबलमा बंशगोपाल बी र शान्तिटोल विजयी

१५ असोज, हेटौँडा । हेटौडा–६ मा रहेको भित्रि फुटवल टिमले आयोजना गरेको वडा टोल स्तरीय फुटवल प्रतियोगिताको बुधवार भएको खेलमा बंशगोपाल युवा क्लव बी र शान्तिटोल फुटवल क्लव विजयी भएका छन् । 
बंशगोपाल युवा क्लव बी र आयोजक भित्री फुटवल टिमबीच भएको बुधबारको पहिलो खेल गोलरहित बराबरीमा सकिए पछि खेल टाईब्रेकरमा पुगेको थियो । टाईब्रेकरमा बंशगोपाल वी ले आयोजक भित्री फुटवल टीमलाई ३–२ ले पाखा लगाएको हो । विजयी टीमको तर्फबाट राजकुमार चौलागाई, रोजन बलामी र दिपेश बलामीले गोल गरेका थिए भने भित्री फुटवल टीमको तर्फबाट सन्तोष मुक्तान र विश्वास विसीले गोल गरेका थिए ।
दोस्रो खेलमा शान्तिटोल फुटवल टीम विजयी भएको छ । शान्तिटोल फुटवल टीमले स्कूलरोड फुटवल टीमलार्ई २–० गोल अन्तरले पराजित गरेको हो । विजयी  टीमको तर्फबाट दिपेश अधिकारी र रिवाज बयलकोटीले १–१ गोल गरको थिए । बुधबारको खेलको म्यान अफ दि म्याच शान्तिटोल फुटवल टीमका रूपेश अधिकारी  घोषित भए ।
असोज १८ गतेसम्म संचालन हुने प्रतियोगितामा प्रथम हुने टिमले २५ देखि ३० किलोको खसी दोश्रो हुने टिमले २० देखि २५ किलोको खसी, मेडल तथा प्रमाणपत्र प्राप्त गर्ने क्लवका अध्यक्ष कमल कोईरालाले बताए । प्रतियोगितामा वडाका १४ टीमको सहभागिता रहेको छ ।