ग्याँस गिजरमा नुहाउँदा मृत्युको मुखमा पुगेका विडारीको अनुभव

प्रेम विडारी (हेटौँडा–५ सानोपोखरा)

२ माघ । कुरा पुस २७ गतेको हो । विहान ९ बजेतिर खाना खाने बेला थियो । खाना खानु अघि नुहानु पर्यो भनेर म बाथरुममा पसें । बाथरुममा पसेर ढोका बन्द गरें, सानो भन्टिलेशन भने खुल्ला थियो । म गिजरबाट धेरै तातो पानी आउने भएकाले तातो पानीमा केही चिसो पानी मिसाएर नुहाउन थालें । बाथरुम एकछिनमा बाफले भरियो । नुहाउने क्रममा एक पटक साबुन लगाएर पखालेकोसम्म मलाई थाहा छ । 
त्यसपछि म अचेत भएछु । मलाई नुहाउने क्रममा असजिलो भएको त्यस्तो कुनै महसुस भएको थिएन । खाना खाने बेला भएको र म नुहाउन गएर नफर्किएकाले श्रीमतिले मलाई बोलाईछिन् । तर म नबोलेपछि उनी भान्साबाट बाथरुमकै ढोका नजिक आएर बोलाईछन् । नबोलेपछि ढोका फुटाएर हेर्दा मलाई अचेत देखेपछि हतार हतार बाथुरुमबाट बाहिर निकालेर एम्बुलेन्समा राखेर चुरेहिल हस्पिटलमा पुर्याएछन् । त्यहाँ पुर्याउँदा त थोरै ढिलो भएको भए ज्यान जाने अवस्था रहेको चिकित्सकले मलाई लैजानेहरुलाई सुनाएछन् । त्यहाँ ३ घण्टा उपचार गरेपछि मलाई चितवन लगियो । चितवन लैजाँदा समेत म अर्धचेत अवस्थामा थिए । अहिले म ठिक छु तर मृत्युको मुखमा पुगेर फर्किएको रहेछु । 
केही दिन एकान्तमा नबस्नु, मानिसहरु भएको ठाउँमै रहनु भन्ने सुझाव चिकित्सकको छ । यसअघि करिब २० दिन अघि गिजर प्रयोग गरेर नुहाउँदा पनि मलाई बाथरुममा रिंगटा लागेको थियो । मैले अन्य कुनै रोग हो कि भनेर जाँच पनि गराएँ । तर बाथरुममा ग्याँस गिजर प्रयोग गर्नु भनेको विष सेवन गर्नु बराबर रहेछ । चिकित्सकको मेडिकल रिपोर्टमा पनि ‘पोईजन’ भनेर लेखेको देखेपछि त मलाई लाग्यो ग्याँस गिजर प्रयोग गरेर नुहाउँदा मन्द विष सेवन गरिरहेको हुँदोरहेछौं । 
चिकित्सकका अनुसार ग्याँस गिजरमा पानी तात्ने क्रममा कार्बनमोनोअक्साइड ग्याँस उत्पन्न हुन्छ । बाथरुममा झ्याल र भेन्टिलेसन राम्रो नभए निस्सासिएर नुहाउने व्यक्तिको मृत्यु हुने रहेछ । गिजर प्रयोग हुँदा प्रोपेन ग्याँस भारी हुने भएकाले भुइँमा बस्ने र अक्सिजन कम भएर कार्वनमोनो अक्साईड ग्याँसको निर्माण हुने र यसले नुहाउने मानिसले स्वासप्रस्वासका क्रममा ‘मन्द विष’ सेवन गरी मृत्युसम्म हुने रहेछ । 
मेरो सबैलाई सुझाव सकभर ग्याँस गिजर प्रयोग नै नगर्नु र गर्नै परे ढोका बन्द नगरी नुहाउने वा पानी अन्य उपायबाट तताएर प्रयोग गर्दा राम्रो हुन्छ ।
(विडारीसंग गरिएको कुराकानीको आधारमा)