हेटौंडामा रगत अभाव, फोन गरेर संकलन गरिंदै

ब्लड बैंकमै पुगेर रक्तदान गर्दै नेपाल पत्रकार महासंघ मकवानपुरका उपाध्यक्ष एवं प्रेस युनियन मकवानपुरका अध्यक्ष कुमार अधिकारी

११ चैत, हेटौंडा । कोरोना संक्रमणको जोखिमका कारण हेटौंडामा रगतको अभाव भएको छ । कोरोना संक्रमणको जोखिम र सरकारको पछिल्लो निर्णयका कारण नेपाल रेडक्रसबाट संचालित ब्लड बैंक हेटौंडामा रगतको अभाव भएको हो । 
बैंकमा अहिले ए पोजेटिभ, एबि पोजेटिभ र बि पोजेटिभ समूहको रगत नरहेको बैंकका प्रमुख टंकप्रसाद दाहालले बताए । ओ पोजेटिभ समूहको रगत पनि निकै कम छ । अहिले दैनिक १० देखि १५ युनिट रगत माग भएपनि पुर्याउन नसकिएको दाहालले बताए । विशेषगरी चुरेहिल अस्पतालमा हुने मिर्गौलाको डायलासिसका लागि रगत आवश्यक पर्ने गरेको छ । त्यसैगरी, अन्य अस्पतालमा अपरेशन र रक्तअल्पताका विरामीका लागि रगतको माग हुने गरेको दाहालले जानकारी दिए । रगतको अभाव भएपनि रक्तदानको काम हुन सकेको छैन । 
केही संघसंस्थाले तय गरेको रक्तदान कार्यक्रम समेत सरकारले २५ जना भन्दा बढि उपस्थित नहुन निर्देशन दिएसंगै रोकिएको उनले बताए । अहिले ब्लड बैंक हेटौंडाले यसअघि नियमित रक्तदान गर्नेहरुलाई फोन गरेर रगत संकलन गरिरहेको छ । रगत अभाव कम गर्न इच्छुक रक्तदाताले ब्लड बैंकको फोन नम्बर ०५७-५२२९७७ मा फोन गरे सम्बन्धित स्थानमै गएर रगत संकलनको तयारी भईरहेको छ । ब्लड बैंक प्रमुख दाहाल (९८४५०२९९७७) र विष्णु रिमाल (९८४५०३०७७५) संग सम्पर्क गरी रगत संकलनमा सहयोग गरिदिन उनीहरुले आग्रह गरेका छन् ।