मानव बेचविखन बिरुद्धको अभियानमा एकजुट हुन जोड

३ फागुन, हेटौंडा । मानव बेचविखन बिरुद्धको अभियानमा सबै सरोकारवालाले प्रभावकारी समन्वय र सहकार्य गर्नुपर्नेमा एक कार्यक्रममा जोड दिईएको छ ।

मंगलबार हेटौँडामा आयोजित मानव बेचविखन बिरुद्धको सवालमा प्रभावकारी सेवा सम्बन्धी समन्वयात्मक कार्यक्रमका सहभागीले यस्तो बताएका हुन् । कार्यक्रम अमेरिकी सहयोग नियोग (यूएसएआईडी) र द एसिया फाउण्डेशनको सहयोगमा शक्ति समूहले आयोजना गरेको हो । कार्यक्रममा सरकारी तथा गैरसरकारी संघसंस्था, अधिबक्ता, प्रहरी कार्यालय, पत्रकार लगायतको सहभागिता रहेको थियो ।

कार्यक्रममा उच्च अदालत बार एशोसिएसनका अध्यक्ष पुष्करबहादुर थापा क्षेत्री र जिल्ला बार एशोसिएसनका अज्मिर केशीले कानुनी सहयोग गर्न आफुहरु तयार रहेको बताए । हेटौँडा उपमहानगरपालिकाका सामाजिक बिकास महाशाखा प्रबन्धक भिमप्रसाद तिमल्सिनाले श्रोत पर्याप्त भएकाले सरोकारवालाले प्रभाबकारी रुपमा समन्वय र सहकार्य गर्नुपर्नेमा जोड दिए ।

कार्यक्रममा घरेलु तथा साना उद्योग कार्यालयका पुष्कर भट्टराईले सीप सिकेर आयआर्जनमा सहभागी हुन चाहनेलाई सहयोग जारी रहेको बताए । कार्यक्रममा जिल्ला शिक्षा कार्यालयका श्रोत व्यक्ति नारायण भण्डारी, महिला तथा बालबालिका कार्यालयकी दुर्गा घिमिरे, गैरसरकारी संस्था महासंघ मकवानपुरकी कुमारी वाईबा लगायतले मन्तव्य व्यक्त गरेका थिए ।

कार्यक्रममा शक्ति समूह क्षेत्रीय कार्यालय हेटौँडाकी परियोजना संयोजक अस्मिता तामाङ्गले कार्यपत्र प्रस्तुत गरेका थिए । कार्यक्रममा शक्ति समूह केन्द्रिय कार्यालय काठमाडौँकी परियोजना संयोजक सरला तामाङ्गले स्वागत तथा कार्यक्रमको उद्धेश्यबारे बताएकी थिईन् ।