दुर्घटना न्यूनिकरणका लागि चालकलाई फुलमाला

१४ पुस, हेटौंडा । भर्खरै जिल्ला प्रहरी कार्यालय मकवानपुर सरुवा भइ आएका प्रहरी उपरीक्षक सुशिलसिंह राठौरले दुर्घटना न्यूनिकरणका लागि र चालकलाई सचेत गराउन नयाँ तरिका अपनाएका छन्। उनले दुर्घटना न्यूनिकरणका लागि चालकलाई फुलमाला लगाएर सहजिकरण गरेका थिए।

उपरीक्षक राठौर  सोमबार बिहान हातमा माला र अबिर लिएर हेटौंडा १ चौकिटोल त्रिभुवन राजपथ स्थित मुख्य सडक खण्डमा हेटौंडाबाट काठमाडौं जादै गरेका सुमो चालकलाई अबिर र माला लगाएर चालकलाई दुर्घटना न्यूनिकरणका लागि सहजिकरण गरिरहेका थिए। उनलाई साथ दिदै थिए मकवानपुर ट्राफिक प्रहरी प्रमुख प्रहरी निरीक्षक हरि बिष्णु ढकाल र प्रहरी निरीक्षक ललन प्रसाद कुर्मीले ।

उपरीक्षक राठौरले जिल्ला भएर जाने टाटासुमो तिव्र गतिमा हुँइकिने गरेको भन्दै यसको न्युनिकरण गर्न चालकको भुमिका अहम् रहने भन्दै माला र टिका लगाई उनिहरूलाई हौसला मिलोस भनेर यसो गरिएको बताए। त्यसैगरी उपरीक्षक राठौरले हेटौंडा १ चौकिटोलमा रहेको संयुक्त सुमो काउन्टर पुगेर १० जना सुमो चालकलाई माला र अबिर लगाई सुमो चलाउदा ध्यान दिन र ट्राफिक नियमको पालना गर्न अनुरोध गरेका थिए। उनले हेटौंडाबाट संचालित सुमो मध्यका उत्कृष्ट भएका सुमो चालक राधाकृष्ण थापा 'राधेराधे' लाई सम्मान गरेका थिए। कार्यक्रममा जिल्ला ट्राफिक प्रहरी कार्यालय मकवानपुरका प्रहरी निरीक्षक हरि बिष्णु ढकालले यस्तो खाले कार्यक्रमलाई निरन्तरता दिन बताए।

उनले यस्तो कार्यले चालकलाई हौसला मिल्ने बताए। कार्यक्रममा जिल्ला प्रहरी कार्यालय मकवानपुरका प्रहरी निरीक्षक ललन प्रसाद कुर्मी, सुमो व्यवसायी, सुमो काउन्टरका कर्मचारी सहित संचारकर्मीको उपस्थितीे रहेको थियो ।