पत्रकार ढकालको हत्या गर्ने दुईजनालाई जन्मकैदको फैसला, ७० हजार जरिवाना

कैद सुनाईएका दुई युवकहरु रातो घेरामा

२ माघ, हेटौंडा । मकवानपुरका सञ्चारकर्मी एवं शिक्षक मनोहर ढकाललाई हत्या गर्ने दुई जनालाई जन्मकैदको सजाय सुनाएको छ । जिल्ला अदालत मकवानपुरले डकैतीसहित हत्या गर्ने हेटौंडा-११ का १९ बर्षीय अनमोल पुडासैनी र मनहरी गाउँपालिका वडा नम्बर १ का १८ बर्षीय प्रविण वाईवालाई जन्मकैद र जरिवाना गर्ने फैसला गरेको हो ।
उनीहरुलाई कर्तव्य ज्यान मुद्धामा जन्मकैद र डाका मुद्धामा १४ वर्ष कैदका साथै जनही ७० हजार रुपैँया जरिवानाको फैसला भएको श्रेस्तेदार केशवराज कौशिकले बताए । ढकालको लुटिएको सुनको औंठी खरिद गर्ने हेटौँडा–२ का सुन व्यवसायी नारायणबहादुर सुनुवारलाई २५ हजार रुपैयाँ जरिवाना, सुन पसल देखाईदिने ठाकुर भुसाललाई मतियारको रुपमा १० हजार जरिवाना गर्ने फैसला गरेको छ । जिल्ला न्यायाधीश डिल्लीरत्न श्रेष्ठको बिहीबारको इजलासले यस्तो फैसला गरेको कौशिकले बताए । ढकालको लुटिएको मोबाइल खरिद गर्ने मोबाइल व्यवसायी भीमफेदी–६ का ३१ बर्षीय दिनेश थापा र अर्का एकजनाले सफाई पाएका छन् ।
हेटौंडा–११ नवलपुरका ३८ वर्षीय पत्रकार ढकालको २०७५ पुस २५ गते हेटौंडा–१ राप्तिपुल माथि भैरवडाँडा जाने सडक भित्रपट्टी जंगलमा हत्या भएको थियो । उनको हत्या गरेका युवकहरुले ढकालले लगाएको सुनको औंठी, मोबाइल, कम्प्युटर हार्ड डिस्क समेत लुटपाट गरेका थिए । घटनाको अनुसन्धानपछि तत्कालिन प्रहरी निरीक्षक मधु थापाको टोलीले उनीहरुलाई पक्राउ गरेको थियो ।
यो पनि पढ्नुस
 हेटौँडामा भएको दुर्घटनामा ढकालको मृत्यु ,       यस्तो छ ढकालको मुत्यु भएको स्थल(तस्विर सहित),     मूख्यमन्त्री पौडेलले लिए ढकालको मृत्युबारे जानकारी,   ढकाल हत्याका आरोपित पक्राउ