बागमती गोल्डकपः मकवानपुरको डाँफे युथ क्लब विजयी

४ फागुन, हेटौंडा । बागमती गाउँपालिकाको वडा नम्बर ८ फापरबारीमा जारी बागमती गोल्डकप फुटबल प्रतियोगिता अन्तर्गत आइतबारको खेलमा मकवानपुरको डाँफे युथ क्लब विजयी भएको छ । 
डाँफे युथ क्लबले बाराको नवजनजागृती युवा क्लब सिमरालाई ४–० गोल अन्तरले हराएको हो । नवजागृती युवा क्लबलाई हराएसँगै डाँफेले सेमिफाइनल प्रवेशको लागि बाटो खोले छ । 
उसले अब ए डिभिजन क्लब जावलाखेल युवा क्लव सँग प्रतिस्पर्धा गर्नेछ । 
डाँफेको जितको लागी खेलको ४० औं मिनेटमा विश्व अधिकारीले पहिलो गोल गरेका थिए । यस्तै डाँफेका लागी  ४४ औं मिनेटमा प्रिजेन तामाङले गोल गरे भने  खेलको ७० औं र ९१ औ मिनेटमा डाँफेका लागी क्रमशः हिसुब थपलिया र रविन स्याङ्तानले गोल गरे । 
आइतबारको खेलमा मकवानपुरका हिसुब थपलिया म्यान अफ दी म्याच घोषित भए । उनले नगद पाँच हजार रुपैयाँ पुरस्कार प्राप्त गरेका छन् । 
प्रतियोगिता अन्तर्गत् सोमबार आयोजक बागमती खेलकुद विकास समिति र च्यासल युवा क्लबबीच प्रतिष्पर्धा हुने आयोजकले जनाएको छ । फागुन १२ गते सम्म चल्ने प्रतियोगिताको विजेताले ६ लाख नगद, शिल्ड र मेडल प्राप्त गर्ने छ भने उपविजेतले ३ लाख पाउँने छ । 
यस्तैगरी प्रतियोगितामा सर्वोत्कृष्ट हु्ने खेलाडीले ५० हजार नगद पाउँदा उत्कृष्ट गोलरक्षक, फरवार्ड, मिडफिल्डर, डिफेन्डर र प्रशिक्षकले जनही १० हजार प्राप्त गर्नेछन् । 
यसअघि भएको पहिलो बागमती गोल्डकपको उपाधी हरिहरपुरगढीले जितेको थियो भने दोस्रो गोल्डकपको उपाधी सरस्वती युवा क्लबले जितेको थियो ।