शिवम् र स्थानीयबीच यस्तो सहमति, गाडि सुचारु

२ चैत, हेटौंडा । हेटौंडा–१७ का स्थानीय र शिवम् सिमेन्ट उद्योगबीच सहमति भएपछि विहानदेखि रोकिएको शिवमका सवारी अपरान्हबाट संचालनमा आएको छ । हेटौंडा उपमहानगरपालिका १७ नम्बर वडा कार्यालयमा स्थानीय र शिवम् सिमेन्टबीच अपरान्ह सकिएको वार्तामा सोमबारबाट सडक स्तरीकरणको काम अघि बढाउने सहमति भएको हो ।
सहमति अनुसार सोमबारबाट सडक स्तरीकरणको काम अघि बढाउने, १५ दिनभित्र सिमेन्ट स्ल्याव ढलानका लागि स्टिमेट तयार गरेर काम अघि बढाउने र आगामी आर्थिक बर्षभित्र चुनडाँडादेखि कर्रा खोलासम्म स्ल्याव ढलान सम्पन्न गर्ने सहमति भएको वार्तामा सहभागी नवराज न्यौपानेले बताए । १५ दिनभित्र काम अघि नबढे सवारी संचालन पुनः रोक्ने उनको भनाई छ । वार्तामा वडा अध्यक्ष भैरवबहादुर राई, वडा सदस्यहरु टिकाप्रसाद तिमल्सिना, भीमप्रसाद अधिकारी, शिवमका डिजिएम सरोज विडारी, समाजसेवी लक्ष्मण कटुवाल, लक्ष्मी बैंकटेश टोल विकास संस्थाका अध्यक्ष बोधनाथ तिमल्सिना लगायतको सहभागिता रहेको थियो । 
शिवम् सिमेन्ट उद्योगका सिमेन्ट, क्लिंकर, ढुंगा बोक्ने सवारीका कारण त्यस क्षेत्रमा पानी परेपछि सडक हिलाम्मे र घाम लागेपछि धुलाम्मे हुने समस्या भएको भन्दै स्थानीयले विहानदेखि सडक अवस्द्ध गरेका थिए । उनीहरुले कान्तिलोकपथदेखि शिवमसम्म जाने सडक स्तरीकरण र सडकमा हुने धुलो र हिलोको समस्या समाधान गर्नुपर्ने मागसहित बागमती प्रदेश सामाजिक विकास मन्त्रालय, जिल्ला प्रशासन कार्यालय मकवानपुर, हेटौंडा नगरपालिका, शिवम् लगायत सरोकारवाला निकायमा जानकारी गराएका थिए । 
यो पनि पढ्नुस्
हेटौंडा–१७ का स्थानीयद्वारा शिवमका गाडि संचालनमा रोक
यसरी गरे स्थानीयले शिवमको गाडि बन्द (भिडियो)
सरसफाई गर्दै चुनडाँडाका स्थानीयद्वारा कान्तिलोकपथ बन्दको चेतावनी