हेटौंडामा सरकारी गाडि दुरुपयोग गरेर सिक्दै (भिडियो)

३ चैत, हेटौंडा । हेटौंडामा एक सरकारी गाडि दुरुपयोग गरी सिक्ने गरेको पाईएको छ । हेटौंडा–९ लामसुरे हेटौंडा सिमेन्ट उद्योगको चौरमा बा१ झ ६३९४ नम्बरको सरकारी गाडी दुरुपयोग गरी सिक्ने गरिएको हो ।
साँझ ५ बजेपछि उक्त गाडि चौरमा लगेर सिक्ने काम भईरहेको स्थानीयले प्रष्ट खबर बताएका छन् । उनीहरुले सरकारी गाडि दुरुपयोग भन्दै समाचार सम्प्रेषणका लागि फोटो र भिडियो समेत पठाएका थिए । आफुहरुले सवारी कुन कार्यालयको हो भन्ने ठम्याउन नसकेको बताए । ‘सवारी सिक्न त हेटौंडामा धेरै ड्राईभिङ सेन्टर छन्, त्यहाँ गएर सिके भयो नि ।’–उनले भने–‘दैनिकजसो यो चौरमा सरकारी गाडि सिक्ने काम भएको छ तर प्रशासनलाई वास्ता छैन ।’ उनले सरकारी गाडिको दुरुपयोग रोक्न निगरानी बढाउनुपर्ने बताए । यसअघि, हेटौंडा–६ चौघडाका स्थानीयले समेत सरकारी सवारी व्यक्तिगत प्रयोजनका लागि प्रयोग भएर त्यस क्षेत्रमा जाने गरेको गुनासो गरेका थिए । राजधानी भएपछि त सरकारी गाडिको दुरुपयोग बढेको छ । ‘नातागोता, साथभाई घुम्न समेत सरकारी सवारीको प्रयोग भएको देखिन्छ ।’–चौघडाका एक स्थानीयले भने ।
यता, जिल्ला ट्राफिक प्रहरी कार्यालय मकवानपुरका प्रहरी निरीक्षक हरि बिष्णु ढकालले आफुहरुले निगरानी बढाउने र सरकारी गाडीमा सिक्ने काम भएको पाईएमा कारवाही हुने बताए ।