लकडाउन फितलो बनेपछि मकवानपुर प्रशासनको कडा निर्णय

२४ चैत, हेटौंडा । पछिल्लो समय लकडाउन फितलो बनेपछि जिल्ला प्रशासन कार्यालय मकवानपुरले कडा निर्णय गरेको छ । प्रमुख जिल्ला अधिकारी दिपकराज नेपालको अध्यक्षतामा सोमबार बसेको कमाण्ड पोष्टको बैठकले लकडाउन प्रभावकारी बनाउन कडाई गर्ने निर्णय गरेको हो । 
जथाभावी मोटरसाइकल चलाउने क्रम बढेपछि अस्पताल जानेबाहेक मोटरसाइकलमा २ जना बस्न नपाईने भएको छ । त्यस्तै, बसापर्क र ख्वपगल्लीको तरकारी पसलबाट थोकमा मात्रै विक्रि वितरण हुने भएको छ । खुद्रा खरिदकर्ताले आफ्नो घर नजिकको पसलबाट मात्रै सामान खरिद गर्नुपर्नेछ । 
कमाण्ड पोष्टको बैठकले अनाश्वयक काम भन्दा बाहेक घरबाट निस्कने र सामान्य कामलाई पनि अत्यावश्यक भन्दै निस्कनेलाई पक्राउ गर्ने निर्णय गरेको मकवानपुर उद्योग बाणिज्य संघका बरिष्ठ उपाध्यक्ष माधव न्यौपानेले जानकारी दिए । प्रशासनले तरकारी र खाद्यान्न किनमेलको समय विहान १० बजेदेखि ३ बजेसम्म तोकेपछि लकडाउनको प्रभाव न्यून हुँदै सवारी संचालनको क्रम बढेको थियो । 
सर्वसाधारणले एक किलो तरकारी र एक किलो खाद्यान्न बोकेर दिनभर किनमेलको बहानामा बजार घुम्ने गरेका थिए । बजारमा पहुँचवालाका प्राईभेट कार र सरकारी गाडिले समेत लकडानलाई वेवास्ता गरेको सर्वसाधारणको गुनासो छ ।