मकवानपुरमा चाउचाउ विष्कुट नबोक्नुस् फर्किनु पर्ला

हेटौंडाको एक पसलमा राखिएका जंक फुड

२६ चैत, हेटौंडा । लकडाउनलाई प्रभावकारी बनाउन मकवनपुर प्रहरीले थप कडाई गर्दै गएको छ । लकडाउनको दिन लम्बिदै जाँदा उल्लंघन गर्ने क्रम पनि बढेपछि प्रहरीले कडाई गर्न थालेको हो । 
सरकारले अत्यावश्यक सेवा र दैनिक उपभोग्य खाद्यान्नका सवारी निर्वाध संचालनमा आउन दिएपछि दुरुपयोग पनि बढेको छ । त्यसले गर्दा प्रहरीले सवारी जाँचलाई पनि कडाई गरेको छ । यसक्रममा मकवानपुर प्रहरीले चाउचाउ, विष्कुट, चिजबल, कुरमुरे, चिप्स जस्ता ‘फास्ट फुड’ बोक्ने सवारीलाई रोक्न थालेको छ । यि सामग्री दैनिक उपभोग्य सामग्री नभएकाले प्रहरीले रोक्न थालेको हो । 
दैनिक उपभोग्य सामग्री दाल, चामल, चिनि, नुन, गेडागुडि लगायतका सामग्रीलाई निर्वाध संचालन हुन दिएको अवस्थामा जंक फुडका सवारी बढि गुड्न थालेपछि माथिको निर्देशन अनुसार जहाँबाट आएको उतै फर्काउन थालिएको एक प्रहरीले बताए । ‘एक गाडि चामल दालको आउँदा ३ गाडि चाउचाउ चिजबल बोकेर आउँछन् ।’–ति प्रहरीले भने–‘उद्योग बाणिज्य संघ जस्ता संस्थाले व्यवसायीलाई सचेत गराउँदा सहज हुन्थ्यो ।’
कोराना संक्रमण विरुद्ध पौष्टिक तत्वको आवश्यकता पर्नेमा चाउचाउ, चिजबल, कुरमुरे, चिप्स जस्ता ‘फास्ट फुड’ ले कुनै फाइदा नगर्ने स्वास्थ्यकर्मीहरुको भनाई छ । हरेक पसलका अगाडि राखिएका यी सामग्रीले बालबालिकाको स्वास्थ्यमा नकारात्मक असर पर्ने उनीहरुको भनाई छ ।