हेटौंडामा कसैमा कोरोना छैन : चौलागाई

३० चैत, हेटौैडा । हेटौंडामा अहिलेसम्म परिक्षण गरिएका कसैमा पनि कोरोना नदेखिएको कोरोना नियन्त्रणमा काम गरिरहेका स्वास्थ्यकर्मीले जनाएका छन् । 
पछिल्लो समय पठाएका स्वाब मध्ये सबै परीक्षण भईसकेको र ति सबै नेगेटिभ (कोरोना नभएको) पाईएको जनस्वास्थ्य अधिकृत एवं आईसोलेसन वार्ड इन्चार्ज भोलाप्रसाद चौलागाईले बताए । 
चौलागाईका अनुसार चैत १४ गतेदेखि आइतबार विहानसम्म १४ जना आईसोलेसनमा ल्याईएकामा १३ जना डिस्चार्ज भईसकेका छन् । उनीहरु सबैको रिपोर्ट नेगेटिभ (कोरोना नभएको) पाईएको छ । ‘हेटौंडामा ल्याई आईसोलेसनमा राखिएका कसैमा पनि कोरोना नपाईएको उनको भनाई छ । ‘अहिलेसम्म हेटौंडामा कसैमा पनि कोरोना छैन ।’–उनले भने । उनका अनुसार शनिबार मात्रै रिपोर्ट नेगेटिभ पाईएपछि हेटौंडा–४ कर्रास्थित आईसोलेसनमा रहेका ४ जना मध्ये ३ जना डिस्चार्ज भएका छन् । आईसोलेसनमा एकजना रहेको र उनको स्वाब परीक्षण हुन बाँकी रहेको छ । त्यस्तै, उपचारका लागि अस्पताल लैजाँदै गर्दा मृत्यु भएकी एक बृद्धाको स्वाब परीक्षण हुँन बाँकी छ । ति महिलामा अन्य कारणले मृत्यु भएको चिकित्सकहरुको भनाई छ । 
हेटौंडा प्रयोगशालाबाट काठमाडौं थप जाँचका लागि लगिएका ३ वटा स्वाब नमूना मकवानपुरका व्यक्तिको नभई पर्साबाट नमूना मात्रै हेटौंडा प्रयोगशालामा ल्याएको हो । पछिल्लो समय संचारमाध्यममा हेटौंडाका ३ जनामा कोरोनाको आशंका वा पुष्टि भन्दै गलत समाचार आएपछि सर्वसाधारणमा त्रास बढेको छ ।