जनकल्याणबाट हेटौंडा-६ वडा कार्यालयलाई आर्थिक सहयोग

२३ बैशाख, हेटौंडा । हेटौडा-६ चौघडा न्यूरेनीमा रहेको जनकल्याण बचत तथा ऋण सहकारी संस्थाले हेटौंडा–६ नम्बर वडा कार्यालयलाई आर्थिक सहयोग गरेको छ । जनकल्याणले वडा कार्यालयको राहत वितरण कार्यलाई सहयोग पुगोस् भन्ने उद्धेश्यले मंगलबार आर्थिक सहयोग गरेको हो । 
संस्थाका अध्यक्ष हिमाल पौडेलले वडा अध्यक्ष अर्जुनप्रसाद चौलागाईलाई १० हजार रुपैंया हस्तान्तरण गरेका छन् । सहयोग रकम वडाभित्रका लकडाउनका कारण दुई छाक टार्न समस्या परेका ज्यालादारी मजदुर र विपन्न परिवारको राहत वितरणमा खर्चिन संस्थाका अध्यक्ष पौडेलले  वडा कार्यालयलाई आग्रह गरे । वडा कार्यालयले लकडाउन शुरु भएदेखि अहिलेसम्म निरन्तर राहत वितरण कार्य गरिरहेको बताउँदै वडा अध्यक्ष चौलागाईले जनकल्याणको आर्थिक सहयोगले यस कार्यमा थप टेवा पुग्ने बताए । 
रकम हस्तान्तरण कार्यक्रममा वडा सदस्यहरु राजकुमार बास्तोला, रामहरी राई, संचारकर्मी भीमसेन पौडेल र स्थानीयको सहभागिता रहेको थियो । हेटौंडा ६ नम्बर वडा कार्यालयले लकडाउन शुरु भएको एक सातादेखि नै राहत वितरण शुरु गरेर चरणबद्ध रुपमा अहिलेसम्म राहत वितरण गरिरहेको छ । नगरपालिकाबाट उपलव्ध राहत वितरणको काम सकेको वडा कार्यालयले विभिन्न दाताहरुबाट प्राप्त राहत सामग्री वितरणका लागि वडा सदस्य रामहरी राईको संयोजकत्वमा समिति गठन गरी राहत वितरण र अनुगमनको काम गरिरहेको वडा अध्यक्ष चौलागाईले बताए ।