७ प्रतिशतले आर्थिक वृद्धि हासिल गरेर देखाउन सरकारलाई चुनौती

१८ जेठ, हेटौंडा । नेपाली कांग्रेसका सांसद जितेन्द्रनारायण देवले आगामी आर्थिक वर्षमा ७ प्रतिशतले आर्थिक वृद्धि हासिल गर्न सरकारलाई चुनौती दिएका छन् ।
राष्ट्रियसभाको आइतबारको बैठकमा बोल्दै सांसद देवले आगामी आर्थिक वर्षमा ७ प्रतिशतले आर्थिक वृद्धि भए राजनीति नै त्याग्ने घोषणा गरे ।
उनले अहिले ठूलो च्यालेन्जको रूपमा रहेकोे आर्थिक क्रियाकलापलाई अगाडि बढाउनु पर्नेमा सरकार उदासीन रहेको उल्लेख गर्दै नेपाल सरकार र अर्थमन्त्रीलाई ७ प्रतिशतको आर्थिक वृद्धि हासिल गरेर देखाउन चुनौती दिए ।
बैठकमा सांसद देवले बजेट कुन वर्गका लागि आएको हो भन्दै प्रश्न समेत गरे । उनले यो समाजको सुकिला मुकिलाहरुको मात्रै बजेट हो की, यो समाजको सुट र टाई लगाउनेहरुको हो भन्दै प्रश्न गरे ।
बजेटमा सिमान्तकृत, विपन्न र गरिब नागरिकलाई नसमेटिएको भन्दै उनले सरकारलाई गरिबमारा बजेट ल्याएको आरोप लगाए ।
लकडाउनको कारण आपूर्ति शून्य भएकाले कलोबजारी र विचौलियाको संख्या बढेको र कृतिम अभाव तथा महंगीलाई रोक्ने खालको बजेट नआएको उनको भनाइ थियोे ।
कोरोना संक्रमणको जोखिम बढ्दै जाँदा पनि सरकारले ६ अर्ब मात्रै बजेट छुट्याएको भन्दै आपत्ति जनाए । पीसीआर परीक्षण गर्न समेत नपुग्ने बजेट आएको उल्लेख गर्दै उनले कोरोना रोकथामका लागि अझै बजेट बढाउनुपर्नेमा जोड दिए ।
उनले कृषि क्षेत्रमा गतवर्ष भन्दा केही बजेट बढाइएको भएपनि मलखादमा ५ प्रतिशत र विउविजनमा १५ प्रतिशत कर बढाएर कृषि क्रान्ति नहुने दाबी गरे ।