लोक सेवा हातामा बृक्षरोपण

१ असार, हेटौंडा । लोक सेवा आयोग स्थापना भएको ६७ वर्ष पुगेको छ । आयोगले आफ्नो बार्षिकोत्सवको अवसरमा लोक सेवा आयोग नारायणी अञ्चल कार्यालय हेटौंडाले कार्यालय हातभित्र बृक्षरोपण तथा सरसफाई कार्यक्रम गरेको छ । 

कार्यालयले बिहीबार बृक्षरोपण, छलफल र सरसफाई कार्यक्रम गरेर स्थापना दिवस मनाएको हो । कार्यालय परिसरमा फूल र विभिन्न जातको विरुवा रोपिएको छ । कार्यालय प्रमुख केशवराज त्रिपाठीको सभाध्यक्षतामा भएको कार्यक्रममा प्रमुख जिल्ला अधिकारी नारायणप्रसाद शर्मा दुवाडीको प्रमुख आतिथ्यता रहेको थियो । 

कार्यक्रममा बोल्दै प्रजिअ दुवाडीले लोक सेवा आयोगलाई मन्दिरको संज्ञा दिएका छन् । उनले सरकारको निष्पक्षता झल्कने आयोगले देशका दक्ष जनशक्तिलाई जनताको सेवामा परिचालन गरेको बताए ।

कार्यक्रममा कार्यालय प्रमुख त्रिपाठीले आव २०७२/०७३ मा हेटौंडाबाट ३ सय १२ जना सरकारी सेवा नियुक्त भएको जानकारी दिए । उनका अनुसार २८ जना बैकल्पिकमा रहेकालाई आयोगले विभिन्न कार्यालयमा नियुक्त गरेको छ ।

कार्यक्रममा जिल्ला शिक्षा अधिकारी बीरेन्द्रजंग थापा, जिल्ला समन्वय समिति प्रमुख नारायण मैनाली, नेपाल पत्रकार महासंघ मकवानपुर शाखाका कोषाध्यक्ष सुदीप शिवाकोटीलगायतको आतिथ्यता रहेको थियो । कार्यालयका नायव सुब्बा कुश रिजालले कार्यक्रम सञ्चालन गरेका थिए ।