घिमिरे परिवार नै व्यवसायिक तरकारी खेतिमा

२१ असोज, हेटौंडा । हेटौंडा-६ चुच्चेखोलाका रोशन घिमिरेको परिवार नै व्यवसायिक तरकारी खेतिमा संलग्न रहेको छ ।
चुच्चेखोला आधुनिक तरकारी कृषि फर्म नै दर्ता गरेर घिमिरेको परिवार केही बर्षदेखि व्यवसायिक कृषिमा संलग्न रहेको हो । घिमिरे दम्पतिलाई उनीहरुका ३ छोराले समेत सहयोग गरिरहेका छन् । उनीहरुको टेनलमा गोलभेडा, घिरौला, करेला, काँक्रा, फर्सी, लौका जस्ता तरकारी खेति हुने गरेको छ । आफ्नो र भाडामा गरी १६ कठ्ठा जग्गामा टनेल निर्माण गरी ३० लाख रुपैंयाको लगानीमा उनीहरुले व्यवसायिक खेति गरेका छन् । 
‘अहिले गोलभेडा, करेला लगायतका तरकारी लगाएका छौं, राम्रो हुँदा एक सिजनमा ५-६ लाख रुपैंयाको तरकारी विक्रि हुन्छ ।’–रोशनले भने–‘त्यतिको तरकारी बेच्न सक्दा १ देखि डेढ लाख रुपैंया नाफा हुन्छ होला ।’ उनका अनुसार तरकारी खेति गर्न विउविजनदेखि मलसम्म लगानी गर्दा नाफा न्यून हुने गरेको छ । ‘प्रशस्तै नाफा कमाउने भन्दा पनि परिवारले गरेको श्रमको मूल्य उठ्छ ।’–उनले भने । 
श्रीमति गायत्री पनि प्रशस्तै नाफा कमाउने भन्दा पनि स्वरोजगार भएकोमा सन्तुष्ट रहेको बताउँछिन् । ‘काम खोज्न अन्यत्र भौतारिनु भन्दा आफ्नै घर परिवार मिलेर काम गर्दा स्वरोजगार भईने भएकाले व्यवसायिक ढंगले तरकारी खेति गरिरहेका छौं ।’–उनले भनिन् । उनका अनुसार आफुहरुले गरेको कामको प्रोत्साहन स्वरुप टनेल निर्माणका लागि संघीय सरकार र ट्याक्टरका लागि प्रदेश सरकारबाट सामान्य सहयोग प्राप्त भएको छ । 
सैद्धान्तिक र प्राविधिक ज्ञान निरन्तर अभिबृद्धिमा भने सहयोग कम रहेको उनको अनुभव छ । तरकारी खेतिमा लाग्ने रोग, मौसमको प्रतिकुलता र प्राकृतिक विपत्तिले आफुहरुले सोचे जस्तो लाभ हासिल गर्न नसकेको उनले बताईन् । कृषि विमाको चर्चा बढि भएपनि यसको लाभ कृषकहरुले लिन नसकेको भन्दै यसलाई स्थानीय सरकारले नै पहल गर्नुपर्ने उनीहरुको सुझाव छ ।