मन्त्रिपरिषद्का नवनियुक्त मन्त्रीहरुले लिए शपथ

२७ जेठ, हेटौंडा । मन्त्रिपरिषद्का नवनियुक्त सदस्यहरूले बिहीवार पद तथा गोपनीयताको शपथ लिएका छन् । शीतल निवासमा सात जना मन्त्री एक राज्यमन्त्रीले पद तथा गोपनीयताको शपथ लिएका हुन् । 
सात जना मन्त्रीलाई राष्ट्रपति विद्यादेवी भण्डारी र एक राज्यमन्त्रीलाई प्रधानमन्त्री केपी शर्मा ओलीले शपथ ग्रहण गराएका छन् । प्रधानमन्त्री केपी शर्मा ओलीले आज सात जना मन्त्री र एक राज्यमन्त्री थप्दै मन्त्रिपरिषद्लाई पूर्णता दिएका हुन् ।
यसअघिको मन्त्रिपरिषद् विस्तारबारे सर्वोच्च अदालतमा मुद्दा विचाराधीन अवस्थामा रहे पनि प्रधानमन्त्रीले फेरि बिहीबार सात जना मन्त्री र एक जना राज्यमन्त्री थप गरिएको हो । 
बिहीबार नियुक्त भएका मन्त्रीहरुमा गृह मन्त्रीमा खगराज अधिकारी नियुक्त हुनुभएको छ । सञ्चार तथा सूचना प्रविधि मन्त्रीमा पूर्व गृह मन्त्री रामबहादुर थापाकी पत्नी नैनकला थापा र उद्योग वाणिज्य तथा आपूर्ति मन्त्रीमा जनता समाजवादी पार्टीका राजकिशोर यादव नियुक्त भएका छन् ।
यस्तै गणेश पहाडी सामान्य प्रशासन मन्त्री, नारदमुनि राना वन मन्त्री, ज्वालाकुमारी साह कृषि, मोहन बानियाँ विना विभागीय र आशा विक वन राज्यमन्त्रीमा नियुक्त भएका छन् । आज मन्त्रिपरिषद् विस्तार भएसँगै मन्त्रीको संख्या २५ पुगेको छ ।