सिन्धुपाल्चोकको विपदमा सरकारले वेवास्ता गरेकोमा संसदमा आक्रोश

१८ असार, हेटौंडा । सिन्धुपाल्चोकमा केही दिन अघि र गतबर्षको विपदमा सरकारले वेवास्ता गरेकोमा संसदमा सांसदहरूले आक्रोश पोखेका छन् ।
प्रदेशसभाको शुक्रबार बसेको बैठकको विशेष समयमा बोल्दै सांसदहरूले संघीय र प्रदेशले सिन्धुपाल्चोक विपद पीडितप्रति वेवास्ता गरेकोमा आक्रोश पोखेका हुन् ।
सांसद रमेश पौड्यालले सरकार सिन्धुपाल्चोक विपदप्रति गैरजिम्मेवार बनेको बताए । उनले सरकारले विपद न्युनिकरणका लागि पूर्वतयारीको काम गर्न चुक्दा पटक पटक सिन्धुपाल्चोकबासी विवदको पीडा झेल्न बाध्य भएको बताए । प्रदेश सरकारलाई तत्काल स्थानीय सरकार र संघसंस्थासंग सहकार्य गरि अघि बढ्नुपर्नेमा जोड दिए ।
सांसद युवराज दुलालले सिन्धुपाल्चोकमा भएको जनधनको क्षतिमा प्रदेश सरकारले ठोस काम थाल्नुपर्नेमा जोड दिए । उनले अर्बौं रकम लिएर प्रदेश सरकारले सिन्धुपाल्चोकका लागि केही नगरेकोप्रति उनको आक्रोश पोखे । उनले सिन्धुपाल्चोकको विपद क्षेत्र बागमती प्रदेशमै छ भन्ने प्रश्न गर्दै सरकारले नालायकीपन देखाएको बताए ।
बैठकमा बोल्दै सांसद राजेन्द्र पाण्डेले सिन्धुपाल्चोकमा विपदबाट समस्यामा परेकाहरूलाई राहतको काम गर्नुपर्ने, यातायात सुचारू हुने व्यवस्था गर्नुपर्ने र खोला व्यवस्थापन गरि बाँकी रहेको बस्ती र खेतबारी संरक्षण गर्नुपर्नेमा जोड दिए ।
सांसद सुरेन्द्रराज गोसाईले बागमती प्रदेश सरकार हेटौंडामा नभई सिन्धुपाल्चोकमा पुगोस् भन्दै कटाक्ष गरे । विपदको हेलिकप्टरबाट अवलोकन गरि सरकारले प्रतिवेदन मात्रै तयार गर्ने भन्दै सरकारप्रति आक्रोश व्यक्त गरे ।
बैठकमा प्रदिपकुमार कटुवाल क्षेत्रीले सिन्धुपाल्चोक र सिन्धुलीमा भएका विपदमा सरकारले ध्यान दिनुपर्नेमा जोड दिए । बैठकमा सांसद घनश्याम दाहाल, विशाल खड्का, राजकाजी महर्जन, रिना गुरूङ, रमा आले मगर लगायतले धारणा राखेका थिए ।
बैठकमा प्रदेश मामिला समितिका सभापति माधव पौडेल समितिले सिन्धुपाल्चोकमा गरेको अवलोकनको प्रतिवेदन संसदमा पेश गरेका थिए ।