बागमती प्रदेशको बजेट असन्तुलित भएको गुनासो, मन्त्रीले दिए जवाफ

१८ असार, हेटौंडा । बागमती प्रदेशसभामा राजस्व र व्ययमाथिको शुक्रबारको छलफलमा सांसदहरूले बजेट असन्तुलित भएको गुनासो गरेका छन् ।
बैठकमा बोल्दै सांसद राजेन्द्रप्रसाद पाण्डेले आफुले संसदमा पटक-पटक बजेट असन्तुलित भएको बताउँदै आएपनि सरकारले वेवास्ता गरेको बताए । कतिपय सांसदहरूको योजना नपर्ने अवस्था रहेको बताउँदै सत्तापक्षकै सांसद उनले बजेट बाँडफाँड गर्नेले समानुपातिक वितरण गर्नुपर्नेमा जोड दिए । ३ बर्षदेखि बजेटमा भएको असन्तुलनको अन्त्य र बजेट खर्च नहुने समस्याको अन्त्य हुनुपर्ने उनको भनाइ छ ।
सांसद न्हुक्षेनारायण श्रेष्ठले पनि बजेट असन्तुलित रहेको बताए । उनले सरकारले असन्तुलित मात्रै नभई खर्च गर्न नसक्ने गरि बजेट खर्च गर्न नसकेको बताए ।  बजेट हचुवाको भरमा विनियोजन र खर्च भइरहेको उनको भनाइ थियो । सरकारले बढिमा ६० प्रतिशतमात्रै खर्च गर्न सक्ने बताउँदै प्राथमिकता पनि फेरबदल भईरहेकोमा आपत्ति जनाए । बजेट खर्च नहुनु र असारमै खर्च गर्नुको कारण के हो भन्दै सरकारसंग प्रश्न गरे । उनले यसलाई पार्टीको गुटको बजेटको संज्ञा दिए ।
सांसद लालकुमारी पुनले बजेट झण्डावाला र 'एसम्यान'हरूको पक्षमा रहेको बताउँदै बजेट असन्तुलित रहेको बताए । बजेट समपुरक र ससर्त बजेटमा विभेद गर्न सरकारलाई 'लाज' लाग्नुपर्ने बताए । बजेट पास गर्न एमाले माधव पक्षलाई बजेटको प्रलोभन दिनु लज्जास्पद विषय भएको बताइन् ।
बैठकमा सांसद राजेन्द्रमान श्रेष्ठले पनि बजेट सन्तुलित अझै हुन नसकेको भन्दै सच्याउन ध्यानाकर्षण गराए । बैठकमा सांसद प्रेमबहादुर पुलामीले स्रोत सुनिश्चितता नभई बजेट ल्याउने काम रोकिनुपर्ने बताए ।
बैठकमा सांसद गीता वाग्ले, देवकी श्रेष्ठ, भावना सुवेदी, चेतनाथ संजेल, भीमसेन खत्री, रिना गुरूङ, राजेन्द्र सिम्खडा, प्रदिप कटुवाल क्षेत्री, विजया केसी श्रेष्ठ, शान्तिप्रसाद पौडेल, सन्तबहादुर प्रजा, राधा घले लगायतले धारणा राखेका थिए । 
बैठकमा आर्थिक मामिला तथा योजना मन्त्री कैलाश ढुंगेलले जवाफ दिएका थिए । योसंग राजस्व एवं व्ययमाथिको छलफल सकिएको छ । बैठकमा मन्त्री ढुंगेलले विनियोजन विधेयक पेश गरेका छन् ।