'महिला उत्पादनका लागि बजार पहिल्याउनु मूख्य खाँचो'

२८ साउन, हेटौँडा । मकवानपुरका प्रमुख जिल्ला अधिकारी डा. मानबहादुर विकले महिलाहरुको उत्पादनका लागि बजार पहिल्याउनु मूख्य खाँचो रहेको बताएका छन् । उनले महिला उद्यमीको संख्या बढेसँगै उत्पादनमा बृद्धि भएपनि बजारीकरण मूख्य समस्या रहेको भन्दै बजार पहिल्याउनतर्फ लाग्नुपर्नेमा जोड दिए । मकवानपुर उद्योग वाणिज्य संघ, महिला उद्यमी विकास समितिको आयोजनामा शुक्रबार हेटौंडामा भएको बृहत महिला उद्यमी व्यवसायी भेलामा बोल्दै प्रजिअ विकले उद्यमशीलताको तालिमसँगै बजार व्यवस्थापनका लागि व्यवसायिक संस्थाहरुले काम गर्नुपर्ने बताए । उनले महिला उद्यमी कोषको गठनका लागि मकवानपुर उद्योग बाणिज्य संघलाई सुझाव दिए । 
भेलामा बोल्दै घरेलु तथा साना उद्योग कार्यालय मकवानपुरका प्रमुख पुष्कर भट्टराईले घरेलु कार्यालयले तालिम, सीप र प्रविधि हस्तान्तरणका लािग समेत काम गरिरहेकाले यसबाट लाभ उठाउन आग्रह गरे । कार्यक्रममा मकवानपुर उद्योग वाणिज्य संघका अध्यक्ष राजकुमार न्यौपानेले मकवानपुरमा उत्पादित हस्तकलाका सामग्री विक्री गर्न ‘कोसेली घर’ स्थापना भएको बताए । उनले  देशको आर्थिक समृद्धिमा महिला उद्यमीको भूमिका महत्वपूर्ण भएको भन्दै हतोत्साही नभई अघि बढे सफलता हासिल गर्न सकिने बताए । 
कार्यक्रममा थाहा उद्योग वाणिज्य संघका अध्यक्ष कविराज खत्री, मउवासंघका पदाधिकारी, विभिन्न गैरसरकारी संस्थाका प्रतिनिधि, महिला उद्यमी विकास समितिका सदस्यहरु लगायतको सहभागिता रहेको थियो । कार्यक्रममा जिल्लाका २ सय बढि महिला उद्यमीको सहभागिता रहेको थियो ।