मकवानपुर जिल्ला बहुद्देश्यीय सहकारी संघको भेला सम्पन्न

३० पुस, हेटौडा । मकवानपुर जिल्ला बहुद्देश्यीय सहकारी संघको आठौं वार्षिक साधारणसभा शुक्रबार सम्पन्न भएको छ।संघको आठौं भेला हेटौडा–९ मा रहेको नारायणी बहुद्देश्यीय सहकारी संस्थाको सभाहलमा सम्पन्न भएको हो।हेटौडा–९ का वडा अध्यक्ष लक्ष्मणप्रसाद भण्डारीको प्रमुख आतिथ्यता एवम सहकारी संघका अध्यक्ष रामहरि न्यौपानेको सभाध्यक्षतामा साधारणसभा तथा भेला सम्पन्न भएको हो। 

भेलामा  संघका अध्यक्ष रामहरि न्यौपानेले संस्थागत प्रतिवेदन, कोषाध्यक्ष विमलकुमार ढकालले आर्थिक प्रतिवेदन र लेखा सुपरिवेक्षण समितिका संयोजक रामेश्वर अर्यालले लेखा समितिको प्रतिवेदन पेश गरेका थिए। 

साधारणसभामा नेपाल बचत तथा ऋण सहकारी संघ, बागमती प्रदेशकी उपाध्यक्ष राधा सिङतान, शिवम सिमेन्टसका विक्री क्षेत्रीय प्रवन्धक सनद गोतामे, नारायणी बहुद्देश्यीय सहकारी संस्थाका अध्यक्ष जंग बहादुर गुरुङ,विभिन्न बहुउद्धेश्यीय सहकारी संस्थाका अध्यक्ष र ब्यवस्थापकहरुको सहभागिता थियो ।

मकवानपुर जिल्लामा रहेको ३२ वटा बहुद्देश्यीय सहकारी संस्थाहरु मध्ये १९ वटा बहुद्देश्यीय सहकारी संस्थाहरु संघमा आवद्ध रहेको र संघले आर्थिक वर्ष २०७७।०७८ मा ३८ लाख ७२ हजारको कारोवार गरेको संघले जनाएको छ।