थप ३७५ मेगावाट बिजुली विक्री गर्न भारतको अनुमति 

google

२४ चैत, हेटौंडा । भारतले प्रतिस्पर्धी बजारमा नेपाललाई थप ३ सय ७५ मेगावाट बिजुली बिक्री गर्न अनुमति दिएको छ । 
भारतले कालीगण्डकी ‘ए’ १४४ मेगावाट, लिखु–४ ५२ दशमलव ४ मेगावाट, मध्य मस्र्याङ्दी ७० मेगावाट, मस्र्याङ्दी ६९ मेगावाट, त्रिशुली र देवीघाट ३९ मेगावाट गरी ३७५ मेगावाटको बिजुली निर्यात गर्न अनुमति दिएको नेपाल विद्युत प्राधिकरणले जनाएको छ । 
प्राधिकरणका विद्युत व्यापार विभागका निर्देशक प्रबल अधिकारीका अनुसार नेपालले भारतसँग वर्षायामअघि नै अनुमति दिन माग गरेको थियो । भारत सरकारको यो निर्णयसँगैनेपालको जलविद्युत विकासका लागि ढोका खुलेको उहाँको भनाइ छ । 
प्रधानमन्त्री शेरबहादुर देउवाको भारत भ्रमणका क्रममा भारतले नेपालको जगेडा बिजुली खरिद गर्ने, नेपालको बिजुली बङ्गलादेशसम्म जान दिने, पञ्चेश्वर बहुउद्देश्यीय आयोजनाको विस्तृत प्रतिवेदन (डीपीआर)दु्रतगतिमा बनाउन निर्देशन दिने, जलस्रोत र जलविद्युतका मामिलामा आपसी सम्मान र आपसी सहमति कायम गर्ने समझदारी भएको थियो । 
यसबाट वर्षायाममा उत्पादित विद्युत मुलुकभित्र खपत गरी अतिरिक्त विद्युतको निर्यात भई दुई देशबीचको व्यापार घाटामा कमी आई अर्थतन्त्रमा सकारात्मक योगदान पुग्ने प्राधिकरणको दाबी छ ।