हक्कीको एम्पायरिङ तालिम सम्पन्न

२२ कार्तिक,हेटौँडा । राष्ट्रिय खेलकुद परिषद् अन्तर्गतको नेपाल खेलकुद विज्ञान प्रतिष्ठानको आयोजना तथा नेपाल हक्की संघको प्राविधिक सहयोगमा नेपालमै पहिलो पटक हेटौंडामा आयोजना गरेको हक्की खेलको एम्पायरिङ तालिम बुधबार सम्पन्न भएको छ । 
 तालिममा साविकका ५ विकास क्षेत्र र नेपाली सेनाको तर्फबाट २/२जना गरी कुल १२ जनाको सहभागिता रहेको थियो । तालिममा दक्षिण एसियाली हक्की प्रतियोगितामा कास्य पदक विजेता विमला भट्टसहित ३ महिला खेलाडी पनि सहभागीता जनाएका थिए । हक्की खेलका अन्तर्राष्ट्रिय एम्पायर सकिल कुरेसीले सहभागि १२ जना खेलाडीलाई एम्पाएर तालिमको प्रशिक्षण दिएको र तालिमसँगै परीक्षा लिएर उत्तीर्ण हुनेलाई एम्पायरको लाइसेन्स समेत प्रदान गरिएकोे हक्की संघका उपाध्यक्ष अनिल शर्माले जानकारी दिए । तालिमपछि लाइसेन्स प्राप्त गर्ने एम्पायरले अन्तर्राष्ट्रिय प्रतियोगिता सञ्चालन गर्ने अवसर पाउने छन शर्माले बताए । ७ दिनसम्म सञ्चालन भएको तालिममा प्रशिक्षक सकिल कुरेसीले खेलाडीको क्षेमता र दक्षता देखेर खुशी लागेको बताउदै एम्पाएरका तालिम लिएका खेलाडीबाट हक्की खेलमा विकास हुने आशा व्यक्त गरे ।  

नेपाल हक्की संघका उपाध्यक्ष अनिल शर्माको अध्यक्षतामा भएको कार्यमक्रममा प्रमुख अतिथि रहेका राष्ट्रिय खेलकुद परिषद (राखेप) अन्तर्गत नेपाल खेलकुद विज्ञान प्रतिष्ठानका कार्यकारी निर्देशक डाक्टर प्रकाश प्रधानले राणाशासनको पालादेखिबाट हक्की खेल खेल्दै आएपनि हक्की खेलको विकास हुन नसकेको र गाउँघरमा खेललाई सरलीकरण गरेर निर्णायकको जिम्मा खेलाडीलाई दिनु पर्ने बताए । कार्यक्रममा नेपाल हक्की संघका सचिव रञ्जन थापा, जिल्ला अध्यक्ष प्रताप सिंह क्षेत्री लगायतकाको उपस्थिती रहेको थियो ।