आशा विशेष पाठशालाको अभिभावक भेला सम्पन्न

२४ बैशाख, हेटौंडा । हेटौंडा उपमहानगरपालिका वडा नम्बर ७ कमानेमा रहेको सी आशा फाउण्डेसनद्धारा सञ्चालित आशा विशेष पाठशाला तथा पुर्नस्थापना केन्द्रको वार्षिक अभिभावक भेला शनिबार समपन्न भएको छ । 
विस २०७३ सालमा स्थापना गरिएको पुर्नस्थापना केन्द्रका अध्यक्ष बालकृष्ण चौलागाईको सभाध्यक्ष तथा जिल्ला समन्वय समितिका प्रमुख ललितबहादुर घलानको प्रमुख आतिथ्यतामा भेला भएको हो ।
प्रमुख अतिथि घलानले विद्यालयमा अध्ययनरत भित्रि क्षमता भएका बालबालिका तथा व्यक्तिहरुमा एउटा प्रतिभा लुकेको हुने र उक्त प्रतिभालाई पहिचान गरि बाहिर ल्याउँने काम गरिरहेको भन्दै आशा बिशेष पाठशालाको प्रशंसा गरे ।
उनले पाठशालाको विशेष खालका बालबालिका र युवाको हेरचाह र शिक्षादिक्षमा महत्वपूर्ण भूमिका निर्वाह गरिरहेको पाठशालाको भौतिक तथा अन्य विकासका लागी तीनै तहको सरकारको ध्यान जानुपर्ने बताए । प्रमुख अतिथि घलानले जिल्ला समन्वय समिति मकवानपुरले आगामी दिनमा पाठाशालाको लागी सक्दो सहयोग र आवस्यक समन्वय गर्ने प्रतिवद्धता व्यक्त गरे ।
कार्यक्रममा आशा विशेष पाठशाला तथा पुर्नस्थापना केन्द्रका संरक्षक आईना बार्काले आफ्नो सुरुवाती अवस्था देखी अहिले सम्म आइपुग्दा सबैको साथ, समन्वय र सहयोगले सफलता मिलेको बताइन् । उनले आगामी दिनहरुमा पनि यस्तै साथ, सहयोग, उत्प्रेरणा र समन्वय रहिरहने विश्वास लिएको बताइन् ।
केन्द्रका अध्यक्ष बालकृष्ण चौलागाईले विद्यालयको अवस्थाबारे जानकारी गराएका थिए भने विद्यालयका प्रिन्सीपल रुपा कार्कीले विद्यालयको आर्थिक प्रतिवेदन प्रस्तुत गरेकी थिइन् । कार्यक्रममा विद्यालयमा अध्ययनरत विद्यार्थीहरुले आफ्नो प्रतिभा नृत्य, गीत, कविता एकल तथा सामूहिक रुपमा प्रस्तुत गरेका थिए । साथै विद्यार्थीहरुद्धारा तयार पारिएको हस्तकलाका सामाग्रीहरु भेलामा प्रदर्शन  गरिएको थियो । 
कार्यक्रममा आशा विशेष पाठशाला तथा पुर्नस्थापना केन्द्रका संस्थापक संरक्षक आमा आईना वार्का, वडा ७ का अध्यक्ष दामोदर गौतम, फाउण्डेसन संस्थापक अध्यक्ष कैलाश न्यौपाने, शिक्षाविद् मोहन ज्ञवाली र दिवाकर चापागाई, केन्द्रका पूर्व अध्यक्ष प्रकाश पौडेल, वडा ६ का वडा सदस्य विजय पौडेल, नेपाल पत्रकार महासंघ मकवानपुरका अध्यक्ष मणिराज गौतम लगायतको आतिथ्यता रहेका थियो । 
पाठशालामा डाउन्सिन्ड्रोम, अर्टिजम, सी.पि स्नायु पक्षघात, बौद्धिक तथा शारिरीक रुपमा भिन्न क्षमता भएका ५५ जना बालबालिका तथा युवाहरु अध्ययनरत रहेका छन् ।