राष्ट्रपति उत्कृष्ट कृषक पुरस्कारबाट पाँच कृषक पुरस्कृत

२४ बैशाख, हेटौंडा । बागमती प्रदेशको कृषि तथा पशुपंक्षी विकास मन्त्रालयले प्रादेशिक राष्ट्रपति उत्कृष्ट कृषक पुरस्कारबाट प्रदेशका पाँचजना उत्कृष्ट कृषकहरुलाई नगद सहित पुरस्कृत गरेको छ ।
मन्त्रालयले हेटौंडामा आइतबार कार्यक्रमको आयोजनागर्दै प्रथम, द्वितिय, तृतीय र सान्त्वना हुने प्रदेशका चितवन, ललितपुर र काभ्रेका कृषकलाई नगद सहित पुरस्कृत गरेको हो । 
यसरी पुरस्कृत हुनेमा चितवनको रत्ननगर नगरपालिका १२ का बि.एण्ड बि. केरा फार्मका संचालक बिष्णुहरी पन्त, ललितपुरको बागमती गाउँपालिका वडा नम्बर १ मा रहेको जनजिबिका कृषि तथा पशु फार्मका सञ्चालक गोविन्द गौतम, चितवनको माडी नगरपालिका ६ का सरोज साह तेली, काभ्रे जिल्लाको पनौती २ को कुशादेवी कृषि फार्मका सञ्चालक रमेश आचार्य र चितवनको भरतपुर १७ का विष्णु देवी एग्रिकल्चर फार्मका सञ्चालक विष्णुबहादुर विश्वकर्मा रहेका छन् ।
पुरस्कृत हुने कृषकहरुमा पन्त, गौतम र साह क्रमश प्रथम, द्वितिय र तृतीय तथा आचार्य र विश्वकर्मा सान्त्वना भएका छन् । प्रथम पन्तले ७० हजार, द्वितिय गौतमले ६० हजार, तृतीय साहले ५० हजार र सान्त्वना भएका आचार्य र विश्वकर्माले ४० हजार नगद सहित सम्मान पत्र प्राप्त गरेका छन् । उनीहरुलाई बागमती प्रदेशको कृषि तथा पशुपंक्षी मन्त्रालयका सचिव डा. शरण पाण्डेल पुरस्कार तथा सम्मान पत्र प्रदान गरेका थिए । 
प्रदेशका विभिन्न जिल्लाबाट उत्कृष्ट भएका ३६ जना कृषक मध्येबाट परस्कृत भएका कृषकहरु क्रमश प्रथम, द्वितिय र तृतीय र सान्त्वना भएको कृषि मन्त्रालयका सूचना अधिकारी अनुप अधिकारीले जानकारी दिए ।