सुर्तिजन्य पदार्थ नियन्त्रणका लागि अभिमुखीकरणको आयोजना

८ जेठ, हेटौंडा । सुर्तिजन्य पदार्थको सेवन र यसबाट लाग्ने रोगको रोकथामका विषयमा हेटौंडामा अभिमुखीकरण कार्यक्रमको आयोजना गरिएको छ । महिला सशक्तिकरण तथा गरिबी निवारण समुह नेपाल मकवानपुरको आयोजना तथा नेपाल सरकार स्वास्थ्य कर कोषको कार्यालय काठमाडौंको सहयोगमा अभिमुखीकरण भएको हो । 
कार्यक्रमका सहभागीहरुले पछिल्लो समय सुर्तिजन्य पदार्थ तथा लागूऔषधको सेवनमा युवाहरु फसेको भन्दै सरकारी तथा गैरसरकारी संस्था मिलेर काम गर्नुपर्ने धारणा राखेका थिए । खुलारुपमा विक्री वितरण हुँदै आएको सुर्तिजन्य पदार्थमा कडाई गर्नुपर्ने सहभागीहरुको माग थियो । 
युवा जागरणका लागि भएको अभिमुखीकरणमा नेपाली कांग्रेस प्रदेश सभापति एवं बागमती प्रदेशसभा सदस्य ईन्द्रबहादुर बानियाँको प्रमुख आतिथ्यता रहेको थियो । कार्यक्रममा बानियाँले देशको कर्णधारका रुपमा रहेका युवाहरु कुलतमा फस्नु दुःखद भएको बताए । 
संस्थाकी अध्यक्ष इन्दिरा न्यौपानेको सभापतित्वमा भएको कार्यक्रममा बागमती प्रदेशका पूर्वमन्त्री एकलाल श्रेठ, प्रदेशसभा सदस्य प्रेमबाहादुर पुलामी, महिला सशक्तिकरण तथा गरिबी निवारण संस्थाका संरक्षक माइकल रामचन्द्र अर्याल, सल्लाहकार बुद्ध लामा, भीमसेन महत, हेटौंडा ५ नम्बर वडा अध्यक्ष सुशिल घिमिरे, नगर सम्वन्य सचिव हर्करत्न लामा लगायतको आतिथ्यता रहेको थियो ।