चौघडामा क्षमता विकास तालिमको आयोजना

९ जेठ, हेटौंडा । टोल विकास संस्थाका पदाधिकारीहरुलाई सक्षम बनाउने उद्धेश्यका साथ मंगलवार देखि टोल विकास संस्था परिचालन तथा क्षमता विकास तालिम शुरु भएको छ । टोल विकास संस्था वडा समन्वय समिति हेटौडा–६ को आयोजना र हेटौडा उपमहानगरपालिकाको आर्थिक सहयोगमा तालिमको आयोजना गरिएको हो । 
४ दिने तालिममा टोल विकास संस्था नगर समन्वय समितिका उपाध्यक्ष विष्णु प्रसाद ढुङगाना, महासचिव शिवहरि दाहाल, सञ्चारकर्मी रुपेश दुलाल र भीमसेन पौडेलले सहजीकरण गर्ने आयोजकले बताएको छ । 
तालिममा टोल विकास संस्थाको उद्धेश्य, अवधारणा, गठन तथा सञ्चालन, टोल विकास संस्थाको सहभागिता, काम, कर्तब्य र अधिकार,टोल विकास संस्थाको निर्देशिका, बैठक सञ्चालन माइन्युट लेखन, कार्यक्रम सञ्चालन, उदघोषण, भाषणकला तथा समय ब्यवस्थापन लगायतका विषयहरुमा सहभागिहरुलाई जानकारी दिने योजना रहेको सचिव राजकुमार फुयाँलले जानकारी दिए । 
हेटौडा–६ का वडा सदस्य विजय पौडेलको प्रमुख आतिथ्यता एवम टोल विकास संस्था वडा समन्वय समिति हेटौडा–६ का अध्यक्ष बासुदेव खतिवडाको सभाध्यक्षतामा भएको उदघाट्न कार्यक्रममा वडा सदस्य लेखराज ढकाल, सरिता सापकोटा, टोल विकास संस्था वडा समन्वय समिति हेटौडा–६ का निवर्तमान अध्यक्ष केशव धिताल लगायतको सहभागिता रहेको थियो ।