हेटौंडा-६ मा संस्था परिचालन तथा क्षमता विकास तालिम सम्पन्न

१२ जेठ, हेटौंडा । टोल विकास संस्था वडा समन्वय समिति हेटौंडा ६ को आयोजनामा भएको टोल विकास संस्था परिचालन तथा क्षमता विकास तालिम सम्पन्न भएको छ । हेटौंडा उपमहानगरपालिकाको आर्थिक सहयोगमा जेठ ९ गतेदेखी १२ गतेसम्म सञ्चालन भएको तालिम शुक्रबार सम्पन्न भएको हो ।
वडामा रहेका २३ वटा टोल विकास संस्थाहरुलाई २ भागमा विभाजन गरी फरकफरक स्थानमा तालिमको आयोजना गरिएको थियो । तालिममा टोल विकास संस्था नगर समन्वय समितिका उपाध्यक्ष विष्णु ढुंगाना, महासचिव शिवहरी दाहाल, नेपाल पत्रकार महासंघ बागमती प्रदेश उपाध्यक्ष रुपेश दुलाल र सञ्चारकर्मी भीमसेन पौडेलले सहजिकरण गरेका थिए । तालिम टोल विकास संस्था वडा समन्वय समिति हेटौंडा-६ का अध्यक्ष वासुदेव खतिवडाको अध्यक्षता एवं हेटौंडा ६ का वडा सदस्य विजय पौडेलको प्रमुख आतिथ्यता रहेको थियो । 
कार्यक्रममा वडा सदस्य पौडेलले टोल विकास संस्थामा आवद्ध सदस्यहरुको क्षमता विकासका लागि र टोल विकास संस्थाहरुकै क्षमता विकासका लागि वडा कार्यालय प्रतिबद्ध रहेको बताए । कार्यक्रममा टोल विकास संस्था नगर समन्वय समितिका उपाध्यक्ष गंगाप्रसाद पौडेलले टोल विकास संस्थाहरुलाई चलायमान बनाउन नगर समितिले विभिन्न योजनाहरु बनाईरहेको बताए । बचत तथा ऋणको कारोवार गर्ने टोल विकास संस्थाहरुलाई लेखापरिक्षणको क्रममा भएको समस्यालाई समाधानको लागि नगरले लेखापरिक्षक राख्ने तयारी गरिरहेको बताए । 
४ दिनसम्म भएको तालिममा २ स्थानमा गरी ८० जनाले सहभागिता जनाएको टोल विकास संस्था वडा समन्वय समितिका सचिव राजकुमार फुयालले जानकारी दिए ।