पिप्ले शहरी स्वास्थ्य केन्द्रद्वारा किशोरी शिक्षा कार्यक्रम शुरु

१६ जेठ, हेटौंडा । हेटौंडा-५ को पिप्ले शहरी स्वास्थ्य केन्द्रले बालज्योती माविबाट किशोरी शिक्षा कार्यक्रम शुरु गरेको छ । हेटौडा उपमहानगरपालिका ५ नम्बर वडा कार्यालयको सहयोगमा किशोरी शिक्षा कार्यक्रम शुरु गरेको हो ।
हेटौंडा उपमहानगरपालिकाका उपप्रमुख राजेश बानियाँको प्रमुख आतिथ्यतामा एवं बिद्यालय व्यवस्थापन समितिका अध्यक्ष रबिन्द्र पोखरेलको अध्यक्षतामा अभियानको उद्घाटन भएको हो ।
कार्यक्रममा वडा अध्यक्ष सुशील घिमिरे, वडा सदस्यहरु ज्ञान बहादुर थापा, राम राई, रन्जिता सिलवाल र भगवती बिक लगायतको उपस्थिति रहेको थियो । कार्यक्रममा बोल्दै उपप्रमुख बानियाँले विद्यालयमा किशोरी शिक्षा हेटौंडाकै नमूना कार्यक्रम भएकोले यसले किशोरीहरुको स्वास्थ्य र सुरक्षामा महत्वपुर्ण सहयोग पुग्ने बताए । 
वडाध्यक्ष घिमिरेले किशोरी लक्षित महत्वपुर्ण कार्यक्रम छनौट गरेको स्वास्थ्य केन्द्रको अभियानमा वडाको सधैं साथ र सहयोग रहने प्रतिबद्धता जनाए । बाल ज्योति माविमा भएको अभिमुखिकरण कार्यक्रममा ५० जना किशोरीहरुको सहभगीता रहेको बताउँदै स्वास्थ्य केन्द्र प्रमुख दुर्गा दाहालले वडाका रहेका सबै बिद्यालयमा किशोरीहरुलाई किशोराबस्थाको स्वास्थ्यबारे अभिमुखिकरण गरिने जानकारी दिइन् ।