स्वास्थ्यमन्त्री बस्नेतले गरे हेटौंडा अस्पताल अनुगमन

२५ जेठ, हेटौंडा । संघीय स्वास्थ्य मन्त्री मोहनबहादुर बस्नेत र बागमती प्रदेशका स्वास्थ्यमन्त्री उत्तम जोशीले बिहीबार हेटौंडा अस्पतालको निरीक्षण गरेका छन् । हेटौंडा अस्पतालको आकस्मिक रुपमा अनुगमन गरेका मन्त्रीद्वयले अस्पतालको अवस्था र उपचार सेवाका बारेमा अस्पताल प्रशासन, सेवाग्राहीसँग जानकारी लिएका थिए ।
अस्पतलामा सेवा लिन आएका सेवाग्राहीहरुले अस्पतालमा उपचारमा ढिलाई हुने गरेको, बीमाको औषधि नपाएको, हरेक ठाउँमा धेरै भिड हुने गरेको भन्दै गुनासो गरेका थिए ।
मन्त्री बस्नेतले अस्पतालका मेसु डा. रामचन्द्र सापकोटालाई अस्पतालको व्यवस्थापनमा ध्यान दिन निर्देशन दिएका थिए । उनले अस्पतालहरुले १० प्रतिशत शैया विपन्नका लागि छुट्याएर निःशुल्क सेवा दिने व्यवस्था मिलाउन पनि निर्देशन दिए । यस्तै उनले सरकारी अस्पतालहरुले उपकरण किनेर प्रयोगमा नल्याउने र थन्क्याएर राख्ने प्रवृति बढेको भन्दै मन्त्रालयसँग समन्वय नगरी कुनै पनि नयाँ उपकरण खरिद नगर्न निर्देशन दिए ।
मन्त्री बस्नेतले राम्रो काम गर्ने स्वास्थ्यकर्मीलाई प्रोत्साहन र काम नगर्नेलाई कारवाही गर्ने भन्दै सेवा गर्ने जिम्मेवारी लिएपछि त्यसबाट पछि हट्नु नहुने र जिम्मेवार भएर काम गर्नुपर्ने बताए । यस्तै अस्पतालको मेसु डा. सापकोटाले अस्पतालले प्रदान गर्दै आएको सेवा र अस्पतालका समस्याका बारेमा जानकारी गराएका थिए ।