उखरमाउलो गर्मी छल्ने उत्कृष्ट गन्तव्य बन्दै मकवानपुरका नदीनाला

सुनिल शिवाकोटी 

२८ जेठ, हेटौंडा । जलवायु परिवर्तनले गर्दा बृद्धि भइरहेको तापक्रमका कारण देशभर दिनप्रति दिन गर्मी बढीरहेको छ । बढ्दो गर्मीका कारण सर्वसाधरणको दैनिकि कष्टकर बन्दै गएको छ । मानिसहरु गर्मी छल्ने विभिन्न उपाएको खोजीमा लागेका छन् ।  
यसैबिच मकवानपुरको भिमफेदी गाउँपालिका स्थित त्रिखण्डी क्षेत्र, सामरी र राप्ति खोला ४० डिग्री तापक्रमको उखरमाउलो गर्मी छल्नका लागी धेरैको रोजाईमा परेका छन् । गर्मी छल्न र मनरोञ्जन गर्नका लागी यी क्षेत्रहरु अहिले धेरैका लागी उत्कृष्ट गन्तव्य बन्दै गएका छन् । 
भिमफोदी गाउपालिका २ मा रहेको त्रिखण्डी, राप्ती खोलाका किनारमा रहेको स्थान आजभोलि बिशेषगरी आन्तरिक पर्यटक तथा बाह्य पर्यटनकहरुले खचाखच भरिने गरेको छ । सम्पूर्ण परिवारका सदस्य हुन या छरछिमेकी या कुनै अफिसका कर्मचारी वा मजदुर, या युगलजोडि नै किन नहुन सबैको मनोरञ्जन तथा गर्मी छल्ने र मन भुलाउने गन्तव्यको रुपमा स्थापना भईरहेको छ त्रिखण्डी क्षेत्र ।
बढ्दो गर्मी भुलेर एकछिन भएपनि परिवारका सदस्य तथा साथीभाइसंग बसेर मिठो खाएर रमाइलो गर्न र खोलामा पौडिएर मनोरन्ज लिन आउँनेहरु हेटौंडा आसपासका मानिस मात्र होइन मकवानपुरको छिमेकी जिल्ला बारा र पर्सा सँगै भारतको रक्सौलबाट समेत यहाँ आउँने गरेका छन् । 
प्रस्टखबर टिम त्रिखण्डी पुग्दा वनभोज खान भारतको रक्सौलबाट आएका रमेश गुप्ताले त्रिखण्डी गर्मीबाट बच्ने उयुक्त स्थान भएको बताए । आफु साथीहरुसंग प्राय समय मिलाएर त्रिखण्डी आउने गरेको बताउँदै गुप्ताले गर्मी छल्न राप्ती खोलामा पौडि खेल्ने र शित्तल छहारीमा बसेर रमाइलो गर्ने गरेको सुनाए ।
त्यसैगरी विरगंजबाट वनभोज खान आएका अरविन्द पटेलले यहाँको चिसो र शान्त वातावरणले आनन्द लागेको बताए । उनले आफु यसैबर्ष मात्रै त्रिखण्डी तेस्रोपटको आएको सुनाए । ‘अहिले विरगंजमा धेरै गर्मी छ । यहाँ आनन्दको लागी आएको । यसैपटक म त तीनचोटी भइसक्यो यहाँ आएको ।’ उनले भने । 
विशेषगरी बारा, पर्सा, रौतहतका साथै भारतको विभिन्न स्थानबाट मानिसहरु यहाँ आउने गरेको  शनिबार भने प्रायः भिडभाड हुने गरेको स्थानीय होटल संचालन गर्दै आएका भक्त बहादुर रानाले बताए । ‘शनिबार त झन धेरै मानिसहरु परिवार सहित आउँछन् । यस्तै स्कुल, कलेजका विद्यार्थीहरु पनि वनभोज खान र खोलामा पौडि खेल्न आउँछन् । शनिबार व्यापार पनि बढी हुन्छ ।’ रानाले सुनाए ।
त्रिखण्डी क्षेत्रमा रहेका खोलाको सरसफाई, आसपासको क्षेत्रमा बृक्षा रोपण र त्यसको राम्रो संरक्षण गर्न सके ठुलै संख्यामा आन्तरिकका साथै बाह्य पर्यटक भित्राउन सकिने देखिन्छ । हजारैको संख्यामा मानिसहरुको चहलपहल हुने उक्त स्थानको  सेडहरी निर्माण गरी, विक्षारोपण गरी गाउपालिकाले गुरु योजनाका साथ अगाडी बढने सके त्रिखण्डीलाई उत्कृष्ट वनभोज स्थल तथा पर्यटकको गन्तव्यको रुपमा विकास गर्न सकिने देखिन्छ ।