हेटौंडा अस्पतालमा दुईवटा डाइलिसिस मेसिन थपियो

१ साउन, हेटौंडा । बागमती प्रदेशको राजधानी हेटौंडामा रहेको एकमात्र सरकारी अस्पताल हेटौंडा अस्पतालमा सोमबारबाट दुईवटा डाइलिसिस् मेसिन थप गरिएको छ ।
आरोग्य फाउण्डेसनले हेटौंडा ११ मा रहेको चुरेहील अस्पतालमा सञ्चालन गरेको डायलिसिस् सेवा बन्द भएपछि हेटौंडा उपमहानगरपालिकाको पहलमा ती मेसिन हेटौंडा अस्पतालमा ल्याइएको मेयर मिना लामाले जानकार दिइन् ।
‘चुरेहील अस्पतालमा डाईलिसिस सेवा बन्द भएपछि उपमहानगरको पहलमा मेसिनलाई हेटौंडा अस्पतालमा ल्याइएको हो । फाउण्डेसनसँग कै सहकार्यमा सोमबारबाट हेटौंडा अस्पतालमा थप दुईवटा मेसिनबाट सेवा दिन सुरुवात गरेका छौं ।’ उनले भनिन् ।
मेसिन बन्द रहँदा चुरेहिलमा उपचार लिदै आएका बिरामीहरु सेवाबाट बञ्चित हुन पर्ने र सेवा लिनका लागि बाहिरी जिल्ला जानुपर्ने भएपछि ती मेसिनलाई हेटौंडा अस्पतालमा ल्याइएको मेयर लामाले बताईन् ।
मिर्गौलाका बिरामीहरुलाई दिँदै आएको सेवालाई थप प्रभावकारी बनाउँनका लागी हेटौंडा अस्पतालमा दुई वटा मेसिन थप गरिएको हेटौंडा अस्पतालका मेडिकल सुपरीटेण्डेन्ट डाक्टर रामचन्द्र सापकोटाले जानकारी दिए ।
उपमहानगरको पहलपछि मिर्गौलाका बिरामीले उपचार सेवा हेटौंडामै पाउने अवस्था बनेको हेटौंडा अस्पतालका मेसु डा. रामचन्द्र सापकोटाले बताए । दुईवटा डायलिसिस मेसिन थपिएसँगै अब हेटौंडा अस्पतालमा मेसिनको संख्या १४ पुगेको छ । तर एउटा मेसिन विग्रिएर ममर्तको काम भइरहेकोले अहिललेलाई १३ वटा मेसिनबाट मात्रै सेवा दिन सकिने डा. सापकोटाले जानकारी दिए ।