भुक्तानी पाउनुपर्ने माग गर्दै व्यवसायीले बुझाए ज्ञापनपत्र 

१० साउन, हेटौंडा । निर्माण व्यवसायी महासंघ बागमती प्रदेश र निर्माण व्यवसायी संघ मकवानपुरले रोकिएको रकम भुक्तानी माग गर्दै मंगलबार प्रधानमन्त्रीलाई ज्ञापनपत्र बुझाएका छन् । 
उनीहरुले निर्माण व्यवसायीहरुले काम गरेपछि पाउँनुपर्ने भुक्तानी रोकिएको भन्दै तत्काल पाउनुपर्ने माग गर्दै प्रधानमन्त्रीलाई ज्ञापनपत्र बुझाएका हुन् । निर्माण व्यवसायी महासंघ बागमती प्रदेशले बागमती प्रदेशको मुख्यमन्त्री कार्यालयमार्फत र निर्माण व्यवसायी संघ मकवानपुरले मकवानपुरका प्रमुख जिल्ला अधिकारीमार्फत ज्ञापनपत्र बुझाएको हुन् । 
निर्माण व्यवसायी महासंघ बागमती प्रदेशका सहकोषाध्यक्ष राजेश भेटवालले मुख्यमन्त्री कार्यालयमा ज्ञापनपत्र बुझाउँदै सरकारले निर्माण व्यवसायीलाई समयमा कामको भुक्तानी नगर्दा निर्माण उद्योग समस्यामा परेको बताए ।सरकारले अमूर्त रुपमा म्याद थप गर्न गरेको निर्णय अस्वीकार्य रहेको भन्दै उनले सबै आयोजनाहरुको एकमुष्ट म्याद थप गर्न पनि माग गरे ।
 यस्तै निर्माण व्यवसायी संघ मकवानपुरका कार्यबाहक अध्यक्ष सागर कटुवालले मकवानपुरका प्रमुख जिल्ला अधिकारी सूर्यप्रसाद सेढाईलाई ज्ञापनपत्र बुझाउँदै पछिल्लो समय निर्माण सामग्रीमा भएको मूल्यवृद्धिलाई संवोधन गर्ने गरी मूल्य समायोजन गर्नुपर्ने बताए । 
निर्माण व्यवसायी महासंघले नौ बुँदे माग राखेर चरणबद्ध आन्दोलनका कार्यक्रम सार्वजनिक समेत गरेको छ ।