दृष्टिविहीनको सहयोगका लागी सांगीतिक कार्यक्रम

२४ साउन, हेटौंडा । दृष्टिविहीन समूदायलाई सहयोग गर्ने उद्देश्यका साथ यहि २७ गते शनिवार हेटौंडाको अनविज्ञ व्याण्डको आयोजनामा सांगीतिक कार्यक्रम हुने भएको छ ।
‘रक फर भिजिविलिटी’ भन्ने मूल नाराका दृष्टिविहीन भएकाहरुको सहयोगका लागि कार्यक्रम आयोजना गर्न लागिएको आयोजकले मंगलबार पत्रकार सम्मेलनमार्फत जानकारी दिएको हो ।
हेटौंडाको एभोकाडो होटलमा आयोजना हुने कन्सर्टबाट संकलित रकम ‘आर्ट एकेडेमी’ निर्माणका लागि सहयोग गरिने आयोजक समितिका सदस्य संग्राम बल लामाले जानकारी दिए । उनका अनुसार कन्सर्टमा अभया सुव्वाको सांगीतिक टोली अभया एण्ड दी स्टिम इञ्जिन, ब्लाइण्ड रक्स र दी फ्रिडम ग्रुप्सले आफ्नो सांगीतिक प्रस्तुती प्रस्तुत गर्नेछन् । 
यसवर्ष अनविज्ञले देशको विभिन्न ठूला ५ शहरमा ‘आर्ट एकेडेमी’ स्थापनाका लागि सांगीतिक कार्यक्रम गर्ने तय भएको जानकारी दिइएको छ । एकेडेमी दृष्टिविहीन, शारीरिक अशक्त भएकाहरुका लागि प्रयोगमा आउने जनाइएको छ । एक स्थानमा सांगीतिक कार्यक्रम गर्दा करिब दशलाख रुपैयाँ खर्च हुने आयोजकको अनुमान छ । 
कार्यक्रमको तयारी अन्तिम चरणमा पुगेको र टिकट विक्री धमाधम भइरहेको बताइएको छ । कार्यक्रमका लागि ब्लाइण्ड रक्स नामक गैरसरकारी संस्थाको समेत सहयोग छ ।