४० बर्षमाथिको फुटवल प्रतियोगिता हुने

१९ भदौ, हेटौँडा । हेटौँडामा कार्तिक २ देखि ६ गतेसम्म ४० बर्षमाथि खेलाडिबीच फुटबल प्रतियोगिता हुने भएको छ । रोटरी क्लव अफ मकवानपुरको आयोजनामा ४० बर्षमाथिका खेलाडिबीच ‘राष्ट्रिय रोटरी कप एट ए साईड फुटवल प्रतियोगिता’ हुने भएको हो । 
प्रतियोगितामा पोखरा, धरान, काठमाण्डौं, चन्द्रनिगाहपुर, सिमरा, कैलाली, आयोजक र स्थानीय लगायत १६ टिमको सहभागिता रहने क्लवका अध्यक्ष ज्योतिरत्न बज्राचार्यले बताए । आइतबार गरेको पत्रकार सम्मेलनमा ‘स्वास्थ्यका लागि खेलकुद’ नाराका साथ भुटनदेवी उच्च माविको खेल मैदानमा एट ए साईड फुटवल प्रतियोगिताको दोस्रो संस्करण हुन लागेको बज्राचार्यले जानकारी दिए । प्रतियोगितामा विजेता टिमले शिल्डसहित नगर ४० हजार १ र दोस्रो टिमले २० हजार रुपैँया प्राप्त गर्नेछन् । नक आउटका आधारमा हुने प्रतियोगितामा हरेक दिन म्यान अफ दि म्याच प्रदान गरिने छ भने म्यान अफ दि सिरिज, हाई स्कोरर, उत्कृष्ट गोलरक्षक समेत घोषणा गरिने जनाईएको छ । 
टिम दर्ताका लागि ५ हजार रुपैँया शुल्क राखिएको छ । प्रतियोगिताको पहिलो संस्करणको उपाधी चितवनले हात पारेको थियो । उद्घाटनका दिन रोटरी र रोट्रयाक्ट क्लवबीच मैत्रिपूर्ण प्रतियोगिता समेत हुने जनाईएको छ । पत्रकार सम्मेलनमा क्लवका संस्थापक अध्यक्ष ज्ञानकृष्ण प्रजापति, सचिव कविन सांगामी, कार्यक्रम संयोजक शरद कर्माचार्य लगायतको सहभागिता रहेको थियो ।