प्रदेश मन्त्री चित्रकारले गरे हेटौंडा सिमेन्टको अनगुमन

७ मङ्सिर, हेटौंडा । बागमती प्रदेशका उद्योग वाणिज्य भुमि तथा प्रशासन मन्त्री रामकृष्ण चित्रकारले हेटौंडा सिमेन्ट उद्योगको अवस्था सुधारका लागि संघीय सरकारसंग पहल गर्ने बताएका छन् । 
बुधबार हेटौंडा सिमेन्ट उद्योगको स्थलगत अनुगमन गर्दै मन्त्री चित्रकारले उत्पादन र रोजगारी सृजना गर्ने उद्योगहरु विना समस्या पूर्ण क्षमतामा चल्ने वातावरण बनाउनु पर्ने बताए । उद्योगको अवस्था सुधारका लागि प्रदेश सरकारले संघीय सरकारसंग समन्वय गरेर समस्या समाधानमा पहल गर्ने उनले बताए ।
संविधानले उद्योगको व्यवस्थापनका अधिकारहरु प्रदेश मातहत रहने व्यवस्था गरेको भएपनि कानुन अभावका कारण अधिकार प्राप्त हुन नसकेको मन्त्री चित्रकारको भनाई छ । उनले उद्योगहरुको अवस्थाका विषयमा जानकार हुँदा हुँदैपनि अधिकार प्राप्त नहुँदा प्रदेश सरकारले धरासायी र जिर्ण बनेका उद्योगहरुको अवस्था सुधारका लागि ठोस पहल गर्न नसकेको दावी गरे । 
अधिकार र कानुनी विषयहरुका विषयमा संघीय सरकार संग नियमित रुपमा छलफल भएको र छिट्टै समाधान हुने उनले विश्वास व्यक्त गरे । मन्त्री चित्रकारले उद्योगको अधिकार संघबाट प्रदेशमा प्राप्त हुने हो भने जुनसुकै मोडलबाट हेटौंडा सिमेन्टसहित अन्य जिर्ण र रुग्ण उद्योग संचालनका लागि प्रदेश सरकार तयार रहेको बताए ।