बागमतीमा सर्वदलीय बैठकः बिना निश्कर्ष टुंगियो

१७ मङ्सिर, हेटौंडा । लामो सयमदेखि पूर्णता पाउँन नसकेको बागमती प्रदेशसभा अन्तर्गत विषयगत समितिहरुलाई पूर्णता दिने बिषयमा सहमती जुटाउँन आइतबार हेटौँडामा बसेको सर्वदलिय बैठक बिना निष्कर्ष टुंगिएको छ । 
मुख्यमन्त्री शालिकराम जम्कट्टेलको पहलमा बागमती प्रदेशसभाका सभामुख भुवन कुमार पाठकले बोलाएको बैठक प्रदेशसभा सचिवालयमा बसेको थियो । बैठकमा सत्तापक्ष गैरजिम्मेवार रुपमा प्रस्तुत भएपछि सहमती हुन नसकेको प्रदेशसभाको प्रमुख प्रतिपक्षी दल एमालले आरोप लगाएको छ । 
एमाले बागमती प्रदेश संसदीय दलका नेता जगन्नाथ थपलियाले बैठकपछि पत्रकारहरुसँग कुरा गर्दै बैठकमा सरकार गैरजिम्मेवार रुपमा प्रस्तुत भएकाले कुनैपनि सहमती हुन नसकेको दावी गरे । उनले मुख्यमन्त्रीले एनजीओ शैलीमा सरकार चलाउन खोज्दा समस्या भएको आरोप लगाए ।
‘सरकारलाई विगतमा प्रतिपक्षी दलहरुसँग गरेको सहमतीको कुनै मतलब छैन । उहाँहरु एनजिओ शैलीमा सरकार चलाउँदै हुनुहुन्छ । सरकारले आफ्ना कार्यकर्तालाई पोस्ने भन्दा अरु काम नै गरेन । जनताको पिर मर्कामा उहाँहरुलाई कुनै मतलब नै छैन,’ नेता थपलियाले असन्तुष्टि व्यक्त गरे । 
यता मुख्यमन्त्री शालिकराम जम्कट्टेलले भने आजै सहमतीमा पुग्न नसकिएको भएपनि अर्को बैठक बसेर सहमती मै विषयगत समितिहरुको सभापति चयन प्रकृया टुंगोमा पु¥याउँनेगरी कुरा भएको दावी गरे । उनले केहि दिनमा पुनः बैठक बसेर समितिको सभापति चयन प्रकृयाका बिषयमा सहमती खोज्ने दावी गरे । सहमती हुन नसकेको अवस्थामा भने प्रकृया अनुसार नै भएपनि सभापति चयन प्रकृया टुंग्याउँने मुख्यमन्त्री जम्कट्टेलले स्पष्ट पारे ।