तीनै तहका सरकारबीच समन्वय भइरहेको छ: जम्कट्टेल

१२ पुस, हेटौंडा । बागमती प्रदेशका मूख्यमन्त्री शालिकराम जम्कट्टेलले तीनै तहका सरकारबीच समन्वय भइरहेको बताएका छन् ।
हेटौंडामा शुरू भएको 'तहगत अधिकारको कार्यविस्तृतिकरणसम्बन्धी संगोष्ठी' मा बोल्दै मूख्यमन्त्री जम्कट्टेलले तहगत अधिकार हस्तान्तरण बाँकी रहेको भएपनि काममा तीनै तहका सरकारबीच समन्वय भइरहेको बताएका हुन् ।
उनले संविधान कार्यान्वयनमा संघीय सरकार पनि प्रतिबद्ध रहेको बताउँदै आफुहरू पनि उत्साहित रहेको बताए । अहिलेको जस्तो विकासको चेतना राजतन्त्रमा नरहेको बताउँदै उनले नकारात्मक भन्दा सकारात्मक ढंगले सोच्ने हो भने अहिले सिमित स्रोत साधनका बिच प्रशस्तै काम भइरहेको बताए ।
संघीयतालाई पूर्ण रूपमा कार्यान्वयनका लागि तहगत अधिकारको बाँडफाँडमा जोड दिनुपर्ने उनको भनाई छ । सबैको सुझावका आधारमा अधिकारको बाँडफाँड हुने उनको विश्वास छ । कार्यक्रममा गाउँपालिका महासंघी अध्यक्ष लक्ष्मी पाण्डे, नगरपालिका संघका अध्यक्ष भीमप्रसाद ढुंगाना, कार्यकारी निर्देशक कलानिधि देवकोटा लगायतले मन्तव्य व्यक्त गरेका थिए । 
दुई दिनसम्म चल्ने कार्यक्रममा नेपाल नगपालिका संघ र गाउँपालिका राष्ट्रिय महासंघका पदाधिकारी, ७ प्रदेशका मूख्यमन्त्री, प्रमुख सचिव र मुख्य न्यायाधिवक्ता, जनप्रतिनिधि र विज्ञहरूको सहभागिता रहनेछ ।