संघीय सरकारले प्रदेश सरकारलाई अधिकार दिएन्: कोशीका मुख्यमन्त्री कार्की

१३ पुस, हेटौंडा। कोशी प्रदेशका मुख्यमन्त्री केदार कार्कीले संघीय सरकारले प्रदेश सरकारलाई अधिकार नदिएको आरोप लगाएका छन्। सात वटा प्रदेशका मुख्यमन्त्रीहरुको भेलालाई सम्बोधन गर्न हेटौंडा आएका मुख्यमन्त्री कार्कीले शुक्रवार हेटौंडामा पत्रकार सम्मेलनको आयोजना गर्दै संघीय सरकारले प्रदेश सरकारलाई अधिकार नदिएको आरोप लगाएका हुन्। पत्रकार सम्मेलनमा बोल्दै उनले संघीय सरकारका कारण प्रदेश सरकार स्वायत्त नरहेको र अधिकार नदिएकोले सोचे जस्तो काम गर्न नसकेको बताउदै केन्द्रीय सरकारले प्रदेशलाई खुम्चाउन खोजेको बताएका हुन्।

उनले मिडिया मैत्री बनेर संघीय सरकारले यो गर्छु त्यो गर्छु भन्ने तर संविधानमा उल्लेख गरिएको अधिकार नदिएर प्रदेश सरकार विघटन गर्न तर्फ उन्मुख रहेको आरोप लगाएका छन्।उनले हेटौंडामा हुने ७ प्रदेशका मुख्यमन्त्रीहरुले भेलाले प्रदेशकाका संविधानमा भएका एकल र साझा अधिकारका विषयमा गहन छलफल गर्ने र सुतिरहेको संघीय संसदलाई झकझक्याउने बताए ।

"संघीय सरकारले निजामती कानुनसमेत पास गर्न सकेको छैन्, यता २७५ संसद सुतिरहेका छन्, उनीहरू उठाउन हेटौंडामा ७ वटै मुख्मन्त्रीको भेलाको आयोजना गरिएको हो"- मुख्यमन्त्री कार्कीले भने। 

पत्रकार सम्मेलनमा कार्कीले मुख्यमन्त्रीहरुको बैठकमा तीनै तहका सरकारको साझा अधिकारको विस्तृतीकरण र कानून निर्माण प्रक्रिया, वित्तरआर्थिक विकास क्षेत्र, सेवा क्षेत्र, पूर्वाधार क्षेत्र र वन वातावरण तथा विपत् व्यवस्थापन क्षेत्रको बारेमा कार्यपत्र प्रस्तुत गरिने समेत बताए।

यता हेटौंडामा ७ प्रदेशकै मुख्यमन्त्रीहरुको उपस्थितिमा भएको कार्यक्रममा सातै प्रदेशका प्रमुख सचिव, मुख्य न्यायधिवक्ता, गाउँपालिका राष्ट्रिय महासंघ, नेपाल नगरपालिका संघका पदाधिकारीहरूको पनि सहभागिता रहने छ। मुख्यमन्त्री कार्यालयका अनुसार छलफलपछि शुक्रबारै साझा प्रतिवेदन समेत अनुमोदन गर्ने कार्यक्रम रहेको बागमती प्रदेशका मुख्यमन्त्री सालिकराम जम्मकटेलले जनाएका छन्।