माघबाट बीमा मार्फत उपचार गर्दा १० प्रतिशत बिरामीले तिर्नपर्ने

१६ पुस,हेटौँडा । अब स्वास्थ्य बीमा मार्फत उपचार गर्दा लाग्ने शुल्कको १० प्रतिशत बिरामीले आफै तिर्नपर्ने भएको छ ।

स्वास्थ्य बीमा बोर्डले माघ १ गतेबाट  उपचार गर्दा लाग्ने शुल्कको १० प्रतिशत रकम (सहभुक्तानी) बीमित बिरामीलाई तिराउने भएको हो। बोर्डले स्वास्थ्य बीमा कार्यक्रममा सहभुक्तानी प्रणाली लागू गर्ने कार्यविधि, २०८० ल्याएर स्वास्थ्य सेवा उपभोग गर्दा तोकिएको सेवाका लागि लाग्ने खर्चको १० प्रतिशत रकम सेवा उपभोग गर्ने व्यक्तिले तिर्नुपर्ने भएको हो।यस अघि स्वास्थ्य बीमा मार्फत उपचार गर्दा एक लाख सम्म बीमा बोर्डले व्यर्होथ्यो भने कुनै पनि शुल्क तिर्न पर्दैनथ्यो । अनावश्यक स्वास्थ्य परीक्षणलाई कम गराउन सहभुक्तानी प्रणाली लागू गरिएको  र बीमितले अनावश्यक रुपमा स्वास्थ्य परीक्षण गराउन थालेपछि  त्यसलाई कम गरेर आवश्यक मात्र स्वास्थ्य परीक्षण गराउन यो नियम लागु गरिन लागिएको बोर्डका सूचना अधिकारी ओमकुमारी कँडेलले बताइन् । प्राथमिक स्वास्थ्य केन्द्र र २५ श्ययासम्मका अस्पतालमा गरिएको स्वास्थ्य उपचारमा भने बीमितले १० प्रतिशत रकम तिर्न नपर्ने उनको भनाइ छ ।

सहभुक्तानी प्रणाली सङ्घीय अस्पताल,२५ श्ययाभन्दा माथिका प्रदेश र प्रादेशिक अस्पताल तथा सबै निजी एवं सामुदायिक अस्पतालमा लागू हुनेछ । गरीब, ७० वर्षभन्दा माथिका ज्येष्ठ नागरिक, अशक्त, एचआइभी सङ्क्रमित, जटिल क्षयरोगी, कुष्ठरोगी र महिला स्वास्थ्य स्वयंसेविकालाई भने सहभुक्तानी प्रणाली १० प्रतिशत रकम तिर्नु नपर्ने कार्यविधिमा उल्लेख गरिएको छ ।