हेटौंडाको चालू आर्थिक वर्षको बजेट संशोधन

२२ पुस, हेटौंडा। हेटौँडा उपमहानगरपालिकाले चालू आर्थिक वर्षको बजेटको संशोधन  गरेको छ। शनिबार सम्पन्न १४औँ नगर सभामा उपप्रमुख राजेश बानियाँले संशोधनसहितको बजेट पेस गरेका थिए जसमा चालू आर्थिक वर्षको बजेट संशोधन गर्दै हेटौँडा उपमहानगरले २२ करोड दुई लाख ५५ हजार रुपैयाँ वृद्धि गरेर दुई अर्ब ९० करोड ६२ लाख ६५ हजार रुपैयाँ पुर्‍याएको छ।

यसअघि गत असारमा सम्पन्न १३ औ नगरसभाले दुई अर्ब ६८ करोड ६० लाख १० हजार रुपैयाँको बजेटमा पारित गरेको थियो। 

उपप्रमुख बानियाँले आन्तरिक राजस्व संकलनमा देखिएको प्रगतिको आधारमा चालू आर्थिक वर्षको बजेट संशोधन गरी वृद्धि गरिएको बताएका छन्।

प्रमुख बानियाँका अनुसार चालू आर्थिक वर्षको हालसम्मको अवधिमा आयतर्फ संघीय सरकार समानीकरण तथा ससर्त अनुदानतर्फ ५५ करोड २३ लाख ३५ हजार रुपैयाँ, समपूरक अनुदानतर्फ २३ लाख ७५ हजार रुपैयाँ, विशेष अनुदान ८७ लाख ५० हजार हजार रुपैयाँ, प्रदेश सरकार समानीकरण, ससर्त र समपूरक अनुदान गरी पाँच करोड ६४ लाख ६९ हजार रुपैयाँ प्राप्त भएको छ।  

यस्तै, संघीय सरकार र प्रदेश सरकारबाट प्राप्त हुने राजस्व बाँडफाँटतर्फ ११ करोड ११ लाख ४८ हजार रुपैयाँ, उपमहानगरपालिकाको आन्तरिक स्रोत तथा अल्या आम्दानीसमेत गरी हालसम्म जम्मा ७४ करोड २ लाख ५ हजार रुपैयाँ प्राप्त भएको उनले बताए।

चालू आर्थिक वर्षको ६ महिनाको राजस्व संकलन लक्ष्यअनुसार भइरहेको जानकारी दिँदै उपप्रमुख बानियाँले चालू आर्थिक वर्षको लागि कुल ३० करोड ९४ लाख राजस्व लक्ष्य राखेकोमा १५ पुससम्म १५ करोड ४५ लाख रुपैयाँ रकम संकलन भएको बताए।