बागमती प्रदेशसभाको छैटौं बार्षिकोत्सव मनाइयो

१८ माघ, हेटौंडा । बागमती प्रदेशसभाको बिहीबार छैटौं बार्षिकोत्सव मनाइएको छ ।
बागमती प्रदेशका प्रदेश प्रमुख यादवचन्द्र शर्माको प्रमुख आतिथ्यता एवं सभामुख भुवनकुमार पाठकको सभाध्यक्षतामा कार्यक्रम भएको हो ।
कार्यक्रममा बागमती प्रदेशसभाले हालसम्म बनाउनुपर्ने कानूनमध्ये ७८ वटा कानून पास भएको र पास भएका कानून मध्ये ४३ वटा ऐन रहेको जनाइएको छ । प्रदेशसभाको दोस्रो कार्यकालको हालसम्म ३४ दिन प्रदेशसभा संचालन भएको र ५६ बैठक बसेको थियोे । बैठकबाट प्रदेशसभामा दर्ता भएका १२ विधेयकमध्ये ८ विधेयक पारित भइसकेको जानकारी दिइएको थियो । पास भएकामध्ये एउटा विधेयक पुनर्विचारका लागि प्रदेश प्रमुखबाट प्रदेशसभामा फिर्ता पठाएका छन् । कार्यक्रममा प्रदेशसभाको मोबाइल एप शुभारम्भ एवं पुस्तक विमोचन गरिएको थियो । 
कार्यक्रममा माननीय गिता गुरूङ, मधुसुदन पौडेल, माया श्रेष्ठ, रामप्रसाद ढुंगाना, लक्ष्मीदेवी श्रेष्ठ, प्रदेशसभाका कर्मचारीहरू कानून अधिकृत मनोजकुमार गुप्ता, कम्प्युटर अधिकृत रोशन प्रधान, कम्प्युटर अपरेटर सरिता घिमिरे र कार्यालय सहयोगी मिना ओझालाई सम्मान गरिएको थियो ।
कार्यक्रममा मूख्यमन्त्री शालिकराम जम्कट्टेल, पूर्व मूख्यमन्त्री डोरमणि पौडेल, उपसभामुख अप्सरा चापागाईं, नेपाली कांग्रेस संसदीय दलका नेता बहादुरसिं लामा, एमाले संसदीय दलका नेता जगन्नाथ थपलिया लगायतले मन्तव्य व्यक्त गरेका थिए ।
कार्यक्रममा मन्त्री, सांसदीय दलका नेता, सांसद, प्रदेशका सचिवहरू लगायतको उपस्थिति रहेको थियो ।