प्रधानमन्त्री प्रचण्ड आज हेटौंडा आउने

file photo

१६ चैत, हेटौंडा । प्रधानमन्त्री पुष्पकमल दाहाल प्रचण्ड आज हेटौंडा आउने भएका छन् । निर्माण व्यवसायी महासंघको २५औँ वार्षिक साधारणसभाको उद्घाटन गर्न प्रधानमन्त्री प्रचण्ड आज हेटौंडा आउन लागेका हुन् ।
निर्माण व्यवसायी संघ मकवानपुरको आतिथ्यतामा आज र भोली गरी दुई दिनसम्म महासंघको वार्षिक साधारणसभा हेटौंडामा हुँदै छ । उद्घाटन कार्यक्रममा प्रधानमन्त्री प्रचण्डसँगै उपप्रधानमन्त्री एवं भौतिक पूर्वाधार तथा यातायातमन्त्री रघुवीर महासेठ, सहरी विकासमन्त्री धनबहादुर बुढा पनि सहभागी हुने निर्माण व्यवसायी संघ मकवानपुरका अध्यक्ष बालगोपाल कँडेलले जानकारी दिए ।
साधारणसभामा देशभरका ७७ जिल्ला शाखा, ७ प्रदेश, एशोसियट सदस्य तथा केन्द्रीय समिति, सल्लाहकार तथा प्रतिनिधि र पर्यवेक्षक गरी एक हजार आठ सय जना सहभागी हुने अध्यक्ष कँडेलको भनाई छ ।
सभामा महासचिव र कोषाध्यक्षको प्रतिवेदन पेश हुनेछ भने साधारण सभास्थलमा निर्माण कम्पनीसँग सम्बन्धित २४ वटा स्टलहरु समेत रहने जानकारी बिहीबार भएको पत्रकार सम्मेलनमा जिल्ला अध्यक्ष कँडेलले जानकारी दिए ।
पत्रकार सम्मेलनमा महासंघका केन्द्रीय अध्यक्ष रवि सिंहले निर्माण व्यवसायीले राज्यबाट अझै २० अर्ब रुपैयाँ भुक्तानी पाउन बाँकी रहेको बताएका थिए । उनले राज्यले स्रोत सुनिश्चितता नगरी ठेक्का लगाउँदा समस्या भएको दावी गर्दै राज्यको कमजोरीले निर्माण व्यवसायीले दुःख पाउको आरोप लगाए ।